స్నేహం చేశాడు.. చంపేశాడు..!

యువకుడిని దారుణంగా హత్య చేసిన ఘటన తెలంగాణలోని పెద్దపల్లి జిల్లా గోదావరిఖనిలో చోటు చేసుకుంది. స్నేహితులే మధుకర్​ అనే యువకుడిని తలపై బలంగా కొట్టి హత్య చేశారని పోలీసులు తెలిపారు. వీరికి పాతకక్షలున్నాయా? వేరే కారణాలేవైనా ఉన్నాయా అనే కోణంలో పోలీసులు దర్యాప్తు చేస్తున్నారు.

పెద్దపల్లి జిల్లా గోదావరిఖనిలో ఓ యువకుడిని దారుణంగా హత్య చేసిన ఘటన శుక్రవారం రాత్రి చోటు చేసుకుంది. మృతుడిని జయశంకర్ భూపాలజిల్లా అడవి ముత్తరం మండలం కనుకునూరుకు చెందిన చెన్నూరు మధుకర్​గా గుర్తించారు. మధుకర్​ గత నాలుగేళ్లుగా గోదావరిఖనిలో మిషన్​ పని చేసుకుంటూ లెనిన్ నగర్​లోని మహంకాళి సారయ్య ఇంట్లో అద్దెకు ఉంటున్నాడు. ఈ క్రమంలో మధుకర్​కు గద్దెల వంశీ, అరుణ్ కుమార్ అనే ఇద్దరు యువకులతో పరిచయం అయింది. తక్కువ సమయంలోనే స్నేహితులయ్యారు.

శుక్రవారం నాడు వంశీ తన స్కూటీపై మధుకర్​ను అరుణ్ కుమార్ ఇంటికి తీసుకెళ్లాడు. అరుణ్ కుమార్​ను ముఖం కడుక్కుని రమ్మని పంపాడు. అరుణ్​ తిరిగి వచ్చేసరికి మధుకర్​ రక్తపు మడుగులో నిర్జీవంగా పడి ఉన్నాడు. ఏం జరిగిందో తెలియక మధుకర్​ నిశ్చేష్టుడయ్యాడు. తల పగిలి, మెదడు చిట్లి అక్కడికక్కడే చనిపోయాడు. సమాచారం అందుకున్న గోదావరిఖని వన్​టౌన్ పోలీసులు సంఘటనా స్థలానికి చేరుకుని దర్యాప్తు కొనసాగిస్తున్నారు. ఘటనపై పలు అనుమానాలు వ్యక్తమవుతున్నాయి. వంశీ, మధుకర్​కు ఏమైనా పాత పగలు ఉన్నాయా ? లేదా మరేమైనా కారణాలున్నాయా? అనే కోణంలో పోలీసులు విచారణ చేపట్టారు.