తెలంగాణలోని సిద్ధిపేట జిల్లా వర్గల్ మండల కేంద్రంలో విషాదం నెలకొంది. ఆర్థిక ఇబ్బందులు తాళలేక ఎం.రామచంద్రం అనే కార్పెంటర్ ఆత్మహత్య చేసుకున్నాడు. రామచంద్రం, సువర్ణ దంపతులకు ముగ్గురు ఆడ పిల్లలు. ఇద్దరు కుమార్తెలు ఇంజినీరింగ్ చదువుతున్నారు. కార్పెంటర్ పని బాగా చేయగలడనే పేరున్న అతనికి లాక్‌డౌన్‌ కాలం శాపంగా మారింది. గిరాకీలు లేక గజ్వేల్‌లో ఉన్న దుకాణాన్ని మూసేశాడు.
అంతలోనే ఆయనకున్న అరెకరం భూమిలో కొంత భాగాన్ని కాళేశ్వరం కాలువల నిర్మాణం కోసం సేకరిస్తున్నట్టు ఇటీవలే భూసేకరణ ప్రకటన వెలువడింది. ఈ పరిణామాలన్నీ ఆయన్ను మానసికంగా కుంగదీశాయి. వృత్తిపని నడవని పరిస్థితుల్లో పిల్లల చదువులు కొనసాగించడం ఎలా? వారికి పెళ్లిళ్లు చేయడమెలా! అనే ఆలోచనలు... బతుకుపై ఆయనకున్న ఆశలను క్రమంగా చంపేస్తూ వచ్చాయి. ఇదే అభిప్రాయాన్ని 15 రోజులుగా భార్య, తమ్ముడి వద్ద వ్యక్తం చేస్తుండటంతో వారు ఆయనకు తోడుగా ఉంటూ కనిపెట్టుకుంటూ వస్తున్నారు.