మార్కాపురంలో భారీ అగ్ని ప్రమాదం.. కోటి రూపాయల ఆస్తి నష్టం
FIRE ACCIDENT AT MARKAPURAM : షార్టు సర్య్కూట్‌ కారణంగా ప్రకాశం జిల్లా మార్కాపురం పట్టణం శివాలయం సమీపంలో ఉన్న శ్రీనివాస హార్డ్వేర్, జనరల్‌ ఫ్యాన్సీ దుకాణంలో బుధవారం అర్ధరాత్రి భారీ అగ్ని ప్రమాదం చోటు చేసుకుంది. ఆరంతస్తుల భవనంలో యజమాని పెద్ద ఎత్తున పెయింటింగ్‌, ఇతర సామగ్రి నిల్వ ఉంచడంతో మంటలు పెద్ద ఎత్తున చెలరేగాయి.
తొలుత మార్కాపురం అగ్నిమాపక శకటం చేరుకొని మంటలను అదుపు చేసేందుకు ప్రయత్నించింది. అనంతరం యర్రగొండపాలెం, పెద్ద దోర్నాల, కంభం నుంచి కూడా అగ్నిమాపక సిబ్బంది ఘటనా స్థలానికి చేరుకున్నారు. భవనమంతా అగ్నికీలలు చుట్టుకోవడం, పెద్దఎత్తున ఎగసి పడుతుండటంతో నియంత్రించేందుకు తీవ్రంగా శ్రమించారు.