నేడు ప్రముఖ హాస్యనటుడు వేణుమాధవ్ అంత్యక్రియలు

ప్రముఖ హాస్యనటుడు వేణుమాధవ్ అంత్యక్రియలు నేడు హైదరాబాద్‌లోని మౌలాలిలో జరగనున్నాయి.

అనారోగ్యంతో మృతి చెందిన ప్రముఖ హాస్యనటుడు వేణుమాధవ్ అంత్యక్రియలు నేడు హైదరాబాద్‌లోని మౌలాలిలో జరగనున్నాయి. మధ్యాహ్నం తర్వాత వేణు అంతిమ సంస్కారాలు జరిపేందుకు కుటుంబసభ్యులు ఏర్పాట్లు చేస్తున్నారు. ఈ ఉదయం వేణు భౌతికకాయాన్ని మౌలాలిలోని నివాసం నుంచి అభిమానుల సందర్శనార్థం ఫిల్మ్ చాంబర్‌కు తరలించనున్నారు. అక్కడ నటీనటుల సంఘం వేణు మాధవ్‌కు కడపటి నివాళులు అర్పించనుంది. అనంతరం.. వేణు అంతిమయాత్ర మౌలాలికి చేరుకుంటుంది. అక్కడి శ్మశాన వాటికలో కుటుంబసభ్యులు దహన సంస్కారాలు జరిపించనున్నారు.