విజయవాడలో సంచలనం కలిగించిన భారీ చోరీ కేసును పోలీసులు ఛేదించారు. దుకాణంలో పనిచేస్తోన్న విక్రమ్ సింగ్ దోపిడీకి పాల్పడినట్లు సీపీ బత్తిని శ్రీనివాసులు తెలిపారు. బంగారం, వెండి, నగదు 2 బ్యాగుల్లో పెట్టుకుని వేరే చోట పెట్టి వచ్చాడని చెప్పారు. 7 కిలోల బంగారం, 19 కిలోల వెండి, రూ.42 లక్షలు చోరీకి గురైనట్లు పేర్కొన్నారు. బ్యాగుల్లో పెట్టిన సొత్తంతా రికవరీ చేసుకున్నామన్న ఆయన.. సీసీ కెమెరా దృశ్యాలతో మరిన్ని ఆధారాలు సేకరించామని వెల్లడించారు. ఈ కేసులో ఇంకా ఎవరి ప్రమేయ ఉందన్న అంశంపై విచారణ చేస్తున్నామని అన్నారు.
ఇలా జరిగింది
లాక్డౌన్ కారణంగా వేరే ప్రాంతంలో ఉన్న దుకాణంలోని బంగారాన్ని వన్టౌన్ కాటూరి వీధిలో సాయి చరణ్ జ్యూయలరీస్లోకి మార్చారు. ఎవరైనా వినియోగదారులు వస్తే ఇక్కడ నుంచే నగలు తీసుకువెళ్లి చూపించి విక్రయిస్తున్నారు. అయితే ఈ రోజు ఉదయం 8 గంటల ప్రాంతంలో షాపు సిబ్బంది ఒకరు బంగారు ఆభరణాల కోసం వన్టౌన్ దుకాణంలోకి వచ్చారు. అక్కడ దుకాణంలో పనిచేసే వ్యక్తి విక్రమ్ కట్టి పడేసి ఉండటం చూసి స్థానికులు పోలీసులకు సమాచారమిచ్చారు. రంగంలోకి దిగిన పోలీసులు.. కేసు నమోదు చేసి నిందితులను పట్టుకునేందుకు ఐదు ప్రత్యేక బృందాలను ఏర్పాటు చేశారు. సంఘటనా స్థలంలో సీసీ కెమెరాలున్నాయి. నిందితులు వీడియో రికార్డ్ అయ్యే డీవీఆర్ను మాయం చేశారు.