PATTABHI: ‘జగన్‌రెడ్డిది చీకటి బతుకు. అందుకే అర్ధరాత్రి అయ్యన్న ఇంటిపైకి జేసీబీలను పంపారు’ అని తెదేపా అధికార ప్రతినిధి కొమ్మారెడ్డి పట్టాభిరాం ధ్వజమెత్తారు. ‘జలవనరులశాఖ స్థలాన్ని ఆక్రమించుకుని ప్రహరీ కట్టారని చెబుతున్న వాళ్లకు.. 2019లో అదే శాఖ నిరభ్యంతర పత్రం ఇచ్చిందని తెలియదా? నిజంగా ఆక్రమిస్తే నోటీసు ఇచ్చి వివరణ కోరకుండా అర్ధరాత్రి నోటీసు అంటించి ఎందుకు కూల్చారు?’ అని విలేకరుల సమావేశంలో ఆయన ప్రశ్నించారు. ‘ఆక్రమణకు గురైన స్థలం 2 సెంట్లని నోటీసులో ఉంది. దీనికోసం జేసీబీలు, వందలమంది పోలీసులు, అధికారుల్ని జగన్‌రెడ్డి పంపారు. అయ్యన్నపాత్రుడి సతీమణి నర్సీపట్నంలో కౌన్సిలర్‌. ఇంట్లో మహిళ ఉందనే ఇంగితజ్ఞానం కూడా లేకుండా అర్ధరాత్రి జేసీబీలతో ప్రహరీని కూల్చేశారు’ అని మండిపడ్డారు. ‘అయ్యన్న తాత లచ్చాపాత్రుడు 1957లో ఎమ్మెల్యే. నర్సీపట్నంలోని ప్రభుత్వ పాలిటెక్నిక్‌ కళాశాలకు 22 ఎకరాలను దానం చేసిన చరిత్ర ఆ కుటుంబానిది. నర్సీపట్నం సమీపంలో అయ్యన్నపాలెం అనే ఊరే ఆ కుటుంబం పేరుతో ఉంది. ఆ ఊరికి భూములిచ్చిందీ అయ్యన్న కుటుంబమే’ అని పట్టాభిరాం వివరించారు.
‘జగన్‌రెడ్డి కుటుంబానికి పైసా దానం చేసిన చరిత్ర లేదు. ఇడుపులపాయ ఎస్టేట్‌లో ఎసైన్డ్‌ భూములు కబ్జా చేశారు. హైదరాబాద్‌ లోటస్‌పాండ్‌ ఇంటిపక్కన చెరువును ఆక్రమించి, కేసీఆర్‌ ద్వారా క్రమబద్ధీకరించుకున్నారు. ప్రకాశం జిల్లా మార్టూరులో ఎస్సీ మహిళా ఉపాధ్యాయురాలి ఇంటికెళ్లే దారికి అడ్డంగా వైకాపా నాయకుడు గోడ కట్టారు. ఆమె వీల్‌ఛైర్‌లో తాడేపల్లి ప్యాలస్‌కు వచ్చినా న్యాయం చేయలేని జగన్‌రెడ్డికి సీఎం స్థానంలో ఉండే అర్హత లేదు’ అని దుయ్యబట్టారు.