రైలు ప్రయాణంలో వచ్చే సమస్యల్లో ప్రధానమైనది మరుగుదొడ్ల నుంచి వచ్చే దుర్వాసన. దీనికి అడ్డుకట్ట వేసేందుకు బోగీల్లో బయో టాయిలెట్లు ఏర్పాటు చేశారు. కొన్నేళ్లుగా వీటిని వినియోగిస్తున్నా.. చెత్తా చెదారం వేస్తుండటంతో అవి టాయిలెట్ ట్యాంక్‌లో పోగవుతున్నాయి. మానవ వ్యర్థాలను మాత్రమే డీ కంపోజ్‌ చేసేలా బయోటాయిలెట్లను రూపొందించారు. కానీ అదనంగా వచ్చి చేరుతున్న చెత్తతో బయో టాయిలెట్లు పనికిరాకుండా పోయి వాటిని ఏర్పాటు చేసిన లక్ష్యం నెరవేరటం లేదు. దీనికి పరిష్కారంగా ఆటోమేటెడ్‌ ట్రైన్‌ టాయిలెట్ సీవరేజ్‌ డిస్పోజల్‌ సిస్టంను అభివృద్ధి చేశారు. గుంటూరు జిల్లా చేబ్రోలు ఇంజినీరింగ్‌ కళాశాల ప్రిన్సిపాల్‌ ఆర్‌వీ కృష్ణయ్య. సెన్సార్ల ఆధారంగా పనిచేసే ఈ కొత్త విధానంలో టాయిలెట్ సీటు కింద సాధారణ ట్యాంక్ ఉంటుంది.
రైళ్లు ప్రయాణించే మార్గాల్లో మారుమూల ప్రాంతంలో ప్రతి 200 కిలోమీటర్లకు ఒకచోట పట్టాల కింద సెప్టిక్ ట్యాంక్ ఏర్పాటు చేస్తారు. రైలు ఇంజిన్‌ ఈ సెప్టిక్ ట్యాంక్ వద్దకు రాగానే..దానిపై ఉన్న మూత దానంతట అదే తెరుచుకుంటుంది. రేడియో ఫ్రీక్వెన్సీ ఐడెంటిఫికేషన్‌-ఆర్‌ఎఫ్‌ఐడీ పరిజ్ఞానంతో ఇది పనిచేస్తుంది. ఈ సాంకేతికతతో సెప్టింక్ ట్యాంకు వద్దకు రాగానే ప్రతి బోగిలోని టాయిలెట్ ట్యాంక్ తెరుచుకుని..అందులో పోగైన వ్యర్థాలు కింద ఉన్న సెప్టిక్ ట్యాంకులో పడిపోతాయని చెబుతున్నారు కృష్ణయ్య.