సుదీర్ఘ విరామం తర్వాత రాష్ట్రంలోని థియేటర్లు, మల్టీప్లెక్సుల్లో సినిమాల ప్రదర్శనకు రంగం సిద్ధమైంది. కొవిడ్ దెబ్బకు గత ఏడాదిన్నరలో కేవలం 4 నెలలే బొమ్మ పడింది. ఈ నెల 8 నుంచే థియేటర్ల పునఃప్రారంభానికి ప్రభుత్వం అనుమతిలిచ్చినా ఎక్కడా అవి తెరుచుకోలేదు. ఇవాళ ఇష్క్, తిమ్మరుసు చిత్రాల విడుదల, ఆగష్టు తొలివారంలో మరో 2-3 సినిమాలు క్యూ కట్టడంతో షోలు వేసేందుకు ఎగ్జిబిటర్లు నిర్ణయించారు. విజయవాడ తెలుగు ఫిలిం ఛాంబర్‌లో సమావేశమైన అన్ని జిల్లాల ఎగ్జిబిటర్లు.. ప్రదర్శనలకు ఉన్న కష్టనష్టాలపై సుదీర్ఘంగా చర్చించారు. టిక్కెట్ ధరలపై తీసుకొచ్చిన జీవో నంబర్‌ 35పై పెదవి విరిచారు. దీనిపై వ్యతిరేకతను అధికారుల దృష్టికి తీసుకెళ్లాలని నిర్ణయించారు.
సినీ ప్రియులకు శుభవార్త... నేటి నుంచి తెరుచుకోనున్న థియేటర్లు