విహారయాత్రకు ప్రారంభించి... అనంతలోకానికి వెళ్లాడు

రంజాన్ పండక్కి వచ్చిన మిత్రులతో కలిసి విహారయాత్ర ప్లాన్‌ చేశాడు. సంతోషంగా గడపాలి అన్నాడు. అనుకున్నట్టుగానే పర్యటనకు బయల్దేరాడు. మార్గమధ్యలోనే జరిగిన ప్రమాదంలో మృతిచెందాడు.

కడప జిల్లా రాజంపేట పట్టణం బోయపాలెం-2కి చెందిన మౌలా(27) తన మిత్రులతో కలిసి గురువారం ఉదయం శ్రీకాళహస్తి సమీపంలోని పర్యాటక ప్రాంతానికి వెళ్తూ మార్గ మధ్యమలో మృతి చెందాడు. ఇంటి నుంచి బయల్దేరిన 5 నిమిషాల్లోపే మౌలా మృత్యువాతపడ్డాడు. రాజంపేట పట్టణం బైపాస్ రోడ్డులో మౌలా వెళ్తున్న వాహనాన్ని తాకుతూ ఓ లారీ దూసుకెళ్లింది.ఆ వాహనాన్ని మౌలా స్నేహితులు వెంబడించారు. ఊటుకూరు వద్ద ఆ లారీని ఓవర్‌టేక్‌ చేసే ప్రయత్నంలో ప్రమాదం జరిగిపోయింది. మౌలా అక్కడికక్కడే మృతిచెందాడు. మృతునికి ఏడాదిన్నర క్రితం వివాహం జరగ్గా నెల క్రితం బాబు పుట్టాడు. ప్రమాదానికి కారణమైన లారీ డ్రైవర్​ని పోలీసులు అదుపులోకి తీసుకున్నారు.