'రాష్ట్రం వెంటిలేటర్​పై ఉంది - ఐదేళ్లూ అడవి పందుల తరహాలో మేశారు'

గత ప్రభుత్వం సంపద సృష్టించే ఒక్క పని కూడా చేయలేదన్న సీఎం చంద్రబాబు - ఒక్క ఛాన్స్ అని వచ్చి రాష్ట్రాన్ని సర్వనాశనం చేశారని ధ్వజం

CM Chandrababu Fires on YSRCP: రాజధాని అమరావతి నిర్మాణం ఆపేసి ఏపీ బ్రాండ్​ను దెబ్బతీసింది వైఎస్సార్సీపీ అని ముఖ్యమంత్రి చంద్రబాబు ఆరోపించారు. పోలవరం ప్రాజెక్టును గాలి కొదిలేసి డయాఫ్రాం వాల్​ను దెబ్బతీసేశారన్నారు. వరదలు వస్తున్నా పట్టించుకోకుండా ప్రాజెక్టును నిర్వీర్యం చేశారన్నారు. ప్రభుత్వ టెర్రరిజంతో పరిశ్రమల్ని పారిపోయేలా చేసింది వైఎస్సార్సీపీ అని ఆరోపించారు. తద్వారా మన యువతకు ఉపాధి, ఉద్యోగ అవకాశాలు ఇక్కడ లేకుండా పోయాయన్నారు. బడ్జెట్‌ సమావేశాల సందర్భంగా అసెంబ్లీలో చంద్రబాబు మాట్లాడారు.

AP Brand Destroyed by YSRCP: పీపీఏలను రద్దు చేయటం ద్వారా కరెంటు వాడుకోకుండా 9 వేల కోట్లు డబ్బులు కట్టాల్సి వచ్చిందని సీఎం చంద్రబాబు అన్నారు. కరెంటు ఉన్నా ఎక్కువ రేటుకు బహిరంగ మార్కెట్​లో వేలంలో కొని వినియోగదారులపై భారం వేశారన్నారు. ఒక వ్యక్తి అధికారంలో ఉండి చేసిన తప్పులకు ఇప్పుడు ప్రజలంతా ట్రూఅప్ కింద విద్యుత్ బిల్లులపై అదనపు చెల్లింపులు చేయాల్సిన పరిస్థితి వచ్చిందని విమర్శించారు. ఇసుక మొత్తం దోపిడీ చేసింది వైఎస్సార్సీపీ అని, వారి నిర్వాకం వల్ల నిర్మాణ రంగం దెబ్బతిందన్నారు. మద్యం అయితే ఇక చెప్పాల్సిన పని లేకుండా అక్రమాలు, దోపిడీ చేశారన్నారు. ఒక్క మద్యం షాపులోనూ ఆన్​లైన్​లో నగదు తీసుకోలేదన్నారు.

అంతా తాడేపల్లి ప్యాలెస్​కు తరలించారు:అక్రమాల్లో దోచిన డబ్బంతా తాడేపల్లి ప్యాలెస్​కు తరలించారన్నారు. ఇప్పుడు మళ్లీ ఆ వ్యవస్థను గాడిలో పెట్టామని తెలిపారు. చెత్తపై పన్ను వేసి ప్రజల జీవన ప్రమాణాల్ని దెబ్బతీశారన్నారు. కక్షపూరిత రాజకీయాలతో ప్రజాస్వామ్యమే సిగ్గుపడేలా పోలీసు వ్యవస్థను వినియోగించారన్నారు. కరోనా సమయంలో మాస్కు ఇవ్వమని కోరిన సుధాకర్ అనే వైద్యుడ్ని వేధించి పిచ్చివాడిని చేశారన్నారు. వైఎస్సార్సీపీ ప్రభుత్వం దుర్మార్గంగా ఒక వ్యక్తిని వేధించిందని మండిపడ్డారు. మూలధన వ్యయానికి తిలోదకాలు ఇచ్చి అస్తవ్యస్తం చేశారన్నారు.

అడవి పందుల తరహాలోనే: తద్వారా రాష్ట్రంలో రహదారులన్నీ పూర్తిగా గుంతలు పడిన పరిస్థితి అని ధ్వజమెత్తారు. అడవి పందులు 10 శాతం పంటను తిని మిగతా 90 శాతం పంటను నాశనం చేస్తామని, అదే తరహాలో ఏపీలోనూ అన్ని వ్యవస్థలనూ ధ్వంసం చేశారని విమర్శించారు. ప్రజలు నమ్మి ఓటేసినందుకు దుర్మార్గంగా పాలన చేశారన్నారు. సంపద సృష్టించేందుకు ఒక్క పనిని, ప్రాజెక్టును కూడా చేపట్టలేదని విమర్శించారు. పెట్టుబడుల కోసం వస్తే పారిశ్రామిక వేత్తలను కూడా తరిమేశారన్నారు. ఈసారి ఎన్డీఏ అధికారంలోకి రాకపోతే రాష్ట్రంలో ఉన్న ఆస్తులు అమ్ముకుని వెళ్లిపోవాలని చాలా మంది చెప్పారన్నారు.

కుటుంబ సభ్యుల కోసం కూడా ప్యాలెస్​లు:430 కోట్ల ప్రజాధనంతో ఋషికొండ ప్యాలెస్ కట్టేసుకున్నారని, పర్యావరణ విధ్వంసం చేసి కుటుంబ సభ్యుల కోసం కూడా ప్యాలెస్​లు, ఆఫీస్​లు కట్టేశారన్నారు. ఎన్జీటీకి, హైకోర్టుకు, సుప్రీం కోర్టుకు కూడా వైఎస్సార్సీపీ ప్రభుత్వం తప్పుడు సమాచారం ఇచ్చిందన్నారు. 700 కోట్లతో సర్వే రాళ్లు, పుస్తకాలపై సొంత బొమ్మలేసుకుని దుర్వినియోగం చేశారన్నారు. ఇప్పుడు ఆ బొమ్మలు తీయటానికి డబ్బులు ఖర్చు అవుతున్నాయన్నారు.

సొంత పత్రికకు 400 కోట్లతో ప్రకటనలు: ప్రభుత్వ భవనాలకు రంగులేశారని, వాలంటీర్లకు సాక్షిపత్రిక ఇచ్చేలా డబ్బులు, సొంత పత్రికకు 400 కోట్లతో ప్రకటనలు ఇచ్చేసుకున్నారని సీఎం తెలిపారు. సోషల్ మీడియాలో సైకోలను కూడా తయారు చేశారన్నారు. కన్న తల్లిపైన కూడా పోస్టులు పెట్టి ఆమె శీలాన్ని కూడా శంకించేలా సామాజిక మాధ్యమాల్లో పెట్టారన్నారు. రాష్ట్రంలో ఏ ఆడబిడ్డ అవమాన పడేందుకు వీల్లేదని, చట్టానికి పదునుపెట్టి కఠినంగా చర్యలు తీసుకుంటామన్నారు. ప్రజలు, మహిళల రక్షణ కోసం కఠినంగా నిర్ణయాలు తీసుకుని ఉక్కుపాదంతో అణచివేస్తామని, సామాజిక మాధ్యమాల్లో అసభ్యకరమైన పోస్టులు పెట్టటం వ్యవస్థీకృత నేరంగా మారిపోయిందని మండిపడ్డారు.

CM on Financial Destruction: రాజకీయాల్లోకి వచ్చి 45 ఏళ్లు అయినా తమకు ఓ టీవీ, పత్రిక లేవని, కానీ వస్తూనే టీవీ, పత్రిక పెట్టుకుని పార్టీ పెట్టుకున్నారని విమర్శించారు. రైతు బజార్లు, తహసీల్దారు కార్యాలయాలను, హెల్త్ సెంటర్లను తాకట్టు పెట్టేశారని మండిపడ్డారు. మద్యంపై వచ్చే ఆదాయాన్ని తాకట్టు పెట్టి 25 వేల కోట్ల అప్పులు తెచ్చారన్నారు. పేదలకు చెందిన పథకాలు చాలా మేరకు గండికొట్టారన్నారు. గ్రామీణ ప్రాంతాల్లో రోడ్లు కూడా వేయకుండా కేంద్ర పథకాలను నిర్వీర్యం చేశారన్నారు. ఇప్పుడు 4 వేల 500 కోట్లతో 30 వేల పనులు సంక్రాంతికే పూర్తి చేస్తామని డిప్యూటీ సీఎం పవన్ కల్యాణ్ చెబుతున్నారని గుర్తుచేశారు.

జల్ జీవన్ మిషన్​ను పూర్తిగా వినియోగించుకోకుండా నిలిపేశారన్నారు. ఆ ప్రాజెక్టు ఉంటే ఇంటింటికీ కుళాయి వచ్చి సురక్షితమైన తాగునీరు అందరికీ అందేదని తెలిపారు. ఉత్తరప్రదేశ్ 1 లక్ష కోట్ల రూపాయలతో జల్ జీవన్ మిషన్​తో తాగునీరు ఇస్తోందన్నారు. ప్రయోగాలతో విద్యా వ్యవస్థను సర్వనాశనం చేశారన్నారు. ఇంగ్లీష్ మీడియం గురించి చెప్పి అందరినీ ఇబ్బంది పెట్టారని ఆరోపించారు. ఆయనే తొలిసారిగా ఇంగ్లీష్ మీడియంను ప్రవేశపెట్టలేదని ఎద్దేవాచేశారు.

చీకటి జీవోలను ఆన్​లైన్​లో పెడుతున్నాం:తమ ప్రభుత్వం ఏదీ దాచటం లేదని, అన్ని జీవోలనూ బహిర్గతం చేస్తున్నామన్నారు. గత ప్రభుత్వంలో దాచిపెట్టిన చీకటి జీవోలను కూడా ఆన్​లైన్​లో పెడుతున్నామని స్పష్టంచేశారు. ఇసుక తాము ఉచితంగా ఇస్తే, వైఎస్సార్సీపీ టన్నుకు 475 రూపాయలు వసూలు చేసిందన్నారు. వైఎస్సార్సీపీ హయాంలో వ్యక్తిగత ఆదాయంతో పాటు రాష్ట్ర ఆదాయం కూడా తగ్గిందన్నారు. వ్యవసాయంలో వృద్ధి టీడీపీ హయాంలో 16 శాతానికి పైగా ఉంటే, వైఎస్సార్సీపీ వచ్చాక 10 శాతానికి తగ్గిందన్నారు. ఇలా అన్ని వ్యవస్థలూ కలిపి వృద్ధి రేటు 10.6 శాతానికి పడిపోయిందని ఆరోపించారు.

మరో ఐదేళ్లు వైఎస్సార్సీపీ అధికారంలో ఉంటే ఇంకా అంధకారంలో కూరుకుపోయేవాళ్లమని సీఎం చంద్రబాబు మండిపడ్డారు. అమరరాజా బ్యాటరీస్ లాంటి కంపెనీ ఏపీ నుంచి వెళ్లిపోయి హైదరాబాద్​లో పెట్టుబడులు పెట్టారన్నారు. ఏపీ అంటే అపనమ్మకం ఏర్పడి పరిశ్రమలు ఎవరూ రాలేదని అన్నారు. 25 వేల కేసుల్లో సీఎస్, ఆర్ధిక శాఖ కార్యదర్శి ఇలా ప్రభుత్వ కార్యదర్శులు హైకోర్టులో చేతులు కట్టుకుని నిలబడాల్సిన పరిస్థితి అని విమర్శించారు.

రాష్ట్రం వెంటిలేటర్​పై ఉంది: ఒక విష వలయంలా అంతా మార్చేశారన్నారు. ఆ పరిస్థితుల్ని వివరించేందుకే 7 శ్వేతపత్రాలను విడుదల చేశామని తెలిపారు. ప్రజల నమ్మకాన్ని నిలబెట్టుకునేలా ఒక్కో ఇటుకా పేర్చుకుంటూ వస్తున్నామన్నారు. రాష్ట్రం వెంటిలేటర్​పై ఉంది, దాన్ని మళ్లీ పునర్నిర్మించేలా ప్రయత్నాలు చేస్తున్నామన్నారు. ప్రస్తుతం రోజులు, గంటలు, నిముషాలు లెక్కబెట్టుకుంటూ పనిచేస్తున్నామన్నారు. ఈ 150 రోజుల్లో వినూత్నమైన విధానాలు, ఆలోచనలతో ముందుకు వెళ్తున్నామన్నారు. డబ్బులు లేకపోయినా వినూత్నమైన ఆలోచనలు ఉన్నాయని, పరిశ్రమల్ని, పెట్టుబడుల్ని ఆకర్షించేందుకు ఆరు విధానాలు తీసుకువచ్చామన్నారు.

వారి ముసుగు తీసేసి శాంతిభద్రతలు కాపాడతాం:ఏపీకి ఆదాయం, ఉద్యోగ, ఉపాధి వచ్చేలా ప్రయత్నాలు చేస్తున్నామన్నారు. ఇప్పుడు నెలలో ఒకటో తేదీనే పెన్షన్లు, జీతాలు ఇస్తున్నామని, మానవత్వంతో ఆలోచించి ఏడాదికి 33 వేల కోట్ల పెన్షన్లు ఇచ్చేది ఏపీ ప్రభుత్వమేనని తెలిపారు. పేదలు అన్నం తినే అన్నా క్యాంటీన్లను కూడా నిలిపేశారని దుయ్యబట్టారు. అందుకే 200కు పైగా క్యాంటీన్లను తిరిగి తెరిచామన్నారు. మద్యం, ఇసుక విధానాల్ని సక్రమంగా అమలు చేసే బాధ్యత శాసనసభ్యులు తీసుకోవాలన్నారు. రాజకీయ ముసుగులో నేరం చేస్తే వారి ముసుగు తీసేసి శాంతిభద్రతలు కాపాడతామన్నారు. శాంతిభద్రతల్ని కాపాడటంలో ఎలాంటి రాజీ ఉండబోదని స్పష్టంచేశారు.

20 లక్షల ఉద్యోగాల కల్పన లక్ష్యంగా పనిచేస్తున్నామన్నారు. కేంద్ర సహకారంతో అమరావతి, పోలవరం ప్రాజెక్టులు పట్టాలు ఎక్కాయని తెలిపారు. వంశధార -గోదావరి -పెన్నా నదుల అనుసంధానం ద్వారా కరవు లేకుండా చేస్తామన్నారు. ఉచిత గ్యాస్ సిలెండర్ నేరుగా ఇచ్చేలా కార్యాచరణ చేస్తున్నామని తెలిపారు. ప్రజల భవిష్యత్ కోసమే పెట్టుబడుల్ని తీసుకువస్తున్నామని, అనుమానాలు వదిలేయాలని పారిశ్రామిక వేత్తలకు విజ్ఞప్తి చేస్తున్నామన్నారు. రాష్ట్రంలోని రహదారులపై ప్రతీ కిలోమీటరుకూ వందల సంఖ్యలో గుంతలు ఉన్నాయని, వాటిని పూర్తిగా మరమ్మతు చేసేందుకు నిధులు మంజూరు చేశామన్నారు.

CM CBN on Budget: 1994 ఆర్ధిక మంత్రిగా తాను చేసిన బడ్జెట్ ప్రసంగంలోని ప్రకటన 30 ఏళ్ల తర్వాత పరిస్థితులకు తగినట్టుగా నిజమైందని సీఎం చంద్రబాబు తెలిపారు. 1995లో ఒక ఆదర్శవంతమైన పాలన అందించి సంస్కరణలు చేపట్టామన్నారు. ఇప్పుడు తెలంగాణ అగ్రస్థానంలో ఉందంటే దానికి కారణం టీడీపీ ప్రభుత్వం తీసుకున్న నిర్ణయాలని పేర్కొన్నారు. 2014లో రాష్ట్ర విభజన ఏపీకి తీవ్ర కష్టనష్టాలను మిగుల్చిందని, కరెంటు ఛార్జీలు పెంచకుండా కొరత నుంచి మిగులు విద్యుత్ సాధించగలిగామన్నారు. రాజధాని కూడా లేకుండా ఉన్న రాష్ట్రానికి అమరావతి నిర్మాణం కోసం ప్రణాళికలు చేశామన్నారు.

పథకాలు, పాలసీలు ఇలా అన్ని అంశాల్లోనూ దేశం దృష్టిని ఆకర్షించామన్నారు. ప్రజల్లో మళ్లీ సానుకూల విశ్వాసాన్ని కల్పించామని తెలిపారు. గత ఐదేళ్ల ఆర్ధిక విధ్వంసాన్ని, అస్తవ్యవస్త పాలనను ప్రజలు అర్ధం చేసుకున్నారన్నారు. విభజన వల్ల జరిగిన నష్టం కంటే గత ఐదేళ్లలో జరిగిన రాష్ట్రానికి జరిగిన నష్టమే ఎక్కువని తెలిపారు. ఏపీ 30 ఏళ్లు వెనక్కు వెళ్లిన దుస్థితి ఏపీ బ్రాండ్ దెబ్బతిందన్నారు. ఒకటి రెండు అరాచకాలు, విధ్వంసాలు కావు వైఎస్సార్సీపీ చేసిందన్న సీఎం, వినూత్నమైన రీతుల్లో ప్రజాధనాన్ని దోపిడీ చేశారని, అన్ని వ్యవస్థలూ నాశనం చేశారన్నారు.