சிவகாசி அருகே பட்டாசு ஆலையில் தீ விபத்து!

விருதுநகர்: சிவகாசி அருகே பட்டாசு ஆலை தீபிடித்து எரிந்ததால் பரபரப்பு நிலவியது.

விருதுநகர் மாவட்டம், சிவகாசி அருகே கீழ பெத்தலுபட்டி கிராமத்தைச் சேர்ந்தவர் சண்முகநாதன். இவர் அதே கிராமத்தில் கம்பி மத்தாப்பு ஆலை நடத்தி வருகிறார்.

இந்த பகுதியில் மழை பெய்ததால் ஆலைக்கு இன்று (மே. 7) விடுமுறை விடப்பட்டுள்ளது. இந்நிலையில், அங்கு மழை பெய்தபோது பட்டாசு ஆலையில் உள்ள குடோனில் மின்னல் தாக்கியதில் கட்டடம் முழுவதும் விரிசல் விட்டு தீ பிடித்தது.

இதைக்கண்ட பொதுமக்கள் உடனடியாக தீயணைப்பு துறையினருக்கு தகவல் கொடுத்தனர். தகவலறிந்து சம்பவ இடத்திற்கு விரைந்து சென்ற தீயணைப்பு துறையினர், தீயை அணைத்து கட்டுக்குள் கொண்டு வந்தனர்.

தொழிலாளர்கள் யாரும் இல்லாததால் பெரும் சேதம் தவிர்க்கப்பட்டது. இது குறித்து சிவகாசி கிழக்கு காவல் துறையினர் வழக்குப்பதிவு செய்து விசாரணை மேற்கொண்டு வருகின்றனர்.