சட்டவிரோதமாக மணல் கடத்திய 6 டிராக்டர்கள் பறிமுதல்!

விருதுநகர்: ஸ்ரீவில்லிபுத்தூர் அருகே சட்டவிரோதமாக மணல் ஏற்றி வந்த 6 டிராக்டர்களை வருவாய்த் துறையினர் பறிமுதல் செய்து விசாரணை மேற்கொண்டு வருகின்றனர்.

ஸ்ரீவில்லிபுத்தூர் அருகே மேற்குத் தொடர்ச்சி மலை அடிவாரப் பகுதிகளான மம்சாபுரம், பந்தபாறை ஆகிய இரண்டு பகுதிகளில் வருவாய்த் துறையினர் வட்டாட்சியர் கிருஷ்ணவேணி தலைமையில் ரோந்து பணியில் ஈடுபட்டனர்.

அப்போது அந்த பகுதியில் அனுமதியின்றி சட்டவிரோதமாக மணல் ஏற்றி வந்த 6 டிராக்டர்களையும், மாதா மலை பின்புறம் மறைத்து வைத்திருந்த ஒரு லாரி மணல் குவியலையும் வருவாய்த்துறையினர் பறிமுதல் செய்து ஸ்ரீவில்லிபுத்தூர் வட்டாட்சியர் அலுவலகத்தில் சிறைப்பிடித்து வைத்துள்ளனர்.

மேலும் மணல் மற்றும் மண் திருட்டு சம்பவத்தில் ஈடுபட்ட வைரக்காளை, பாண்டி, வெற்றிவேல் முருகன், பவுன்ராஜ், சரவணக்குமார் ஆகிய நபர்களின் மீது வழக்குப் பதிவு செய்து வருவாய்த் துறையினர் விசாரணை நடத்தி வருகின்றனர்.

இதையும் படிங்க: மக்களுக்கு இடையூறாக இருக்கும் மதுக்கடையை அகற்ற வேண்டும்: ஆட்சியரிடம் மனு!