விருதுநகரில் இளம்பெண் பாலியல் வன்புணர்வு செய்யப்பட்ட வழக்கில் பள்ளி மாணவர்கள் 4 பேர் உள்பட 8 பேரை கடந்த மார்ச் 22ஆம் தேதி விருதுநகர் போலீசார் கைது செய்து வழக்குப்பதிவு மேற்கொண்டனர். இந்த வழக்கு கடந்த சில தினங்களுக்கு முன்பு சிபிசிஐடி போலீசாருக்கு மாற்றப்பட்டது.
சைபர் கிரைம் விசாரணை:இந்த நிலையில் பாலியல் வழக்கில் கைது செய்யப்பட்ட ஹரிஹரன், ஜுனத் அகமது உள்ளிட்ட 8 பேரின் வீடுகளில் சிபிசிஐடி போலீசார் 5 குழுக்களாக சென்று சோதனை மேற்கொண்டர். மேலும், அவர்களின் பெற்றோரிடம் சிபிசிஐடி போலீசார் விசாரணை மேற்கொண்டனர். இந்த நிலையில் கைது செய்யப்பட்ட 8 பேரின் வீட்டில் சோதனை மேற்கொண்ட சிபிசிஐடி போலீசார், அவர்கள் பயன்படுத்திய கைபேசி, மடிக்கணினி உள்ளிட்ட பொருள்களை தீவிரமாக பரிசோதனை செய்து வருகின்றனர். மேலும், அவர்களின் செல்போனில் உள்ள வாட்ஸ்-அப் கணக்கை வைத்து சிபிசிஐடி போலீசார் தீவிர விசாரணை மேற்கொண்டு வருகின்றனர்.