பெண்ணின் சாவில் சந்தேகம்..! பல கோணங்களில் போலீசார் விசாரணை!

விழுப்புரம்: கள்ளக்குறிச்சி அருகே பெண் தூக்கிட்டுத் தற்கொலை செய்துகொண்ட சம்பவத்தில் சந்தேகம் இருப்பதாக உறவினர்கள் கூறிய நிலையில், அது குறித்து காவல்துறையினர் விசாரணை நடத்தி வருகின்றனர்.

விழுப்புரம், மாமந்தூர் கிராமத்தைச் சேர்ந்தவர் அறிவழகன். கட்டட கூலித்தொழிலாளியான இவருக்கு வனிதா(25) என்ற மனைவி உள்ளார். இவர் இளங்கலை பட்டதாரி ஆவார். இவர்களுக்குத் திருமணமாகி நான்கு ஆண்டுகள் ஆகிய நிலையில், இரு குழந்தைகள் உள்ளனர். நேற்றிரவு, வனிதா வீட்டில் கணவர் பிள்ளைகளைத் தூங்க சொல்லி விட்டு, தனது மாமியார் வீட்டிற்குச் சென்று அவருடன் உறங்கிக் கொண்டிருந்தார்.

இன்று காலை ஆறு மணியளவில், தனது வீட்டிற்கு வந்தவர் சிறிது நேரத்தில் தூக்கில் பிணமாகத் தொங்கிக் கொண்டிருந்தார். அப்பொழுது அவரது கணவர் அறிவழகனும், குழந்தைகளும் வீட்டில் உறங்கிக் கொண்டிருந்ததாகக் கூறப்படுகிறது. அனைவரும் உறங்கிக் கொண்டிருக்கிறார்கள் என்று அறிவழகனின் தம்பி வீட்டிற்கு வந்து அவர்களை எழுப்ப முயன்ற போது, வனிதா தூக்கில் பிணமாகத் தொங்கிக் கொண்டிருப்பதைக் கண்டு அதிர்ச்சி அடைந்துள்ளார்.

உடனடியாக அக்கம்பக்கத்தினரை அழைத்து, வனிதாவின் உடலை கீழிறக்கி, கள்ளக்குறிச்சி காவல்துறையினருக்கு தகவலளித்தனர். விரைந்து வந்த உதவி ஆய்வாளர் மணிகண்டன் தலைமையிலான காவல்துறையினர், உடலைக் கைப்பற்றி கள்ளக்குறிச்சி அரசு மருத்துவமனைக்கு உடற்கூறாய்வுக்காக அனுப்பி வைத்தனர்.

வனிதாவிற்கும், அறிவழகனுக்கும் திருமணமாகி நான்கு ஆண்டுகளே நிறைவடைந்துள்ளதால், கள்ளக்குறிச்சி காவல் துணைக் கண்காணிப்பாளர் இராமநாதன், இச்சம்பவம் குறித்து விசாரணை செய்து வருகிறார். வனிதாவின் சாவில் மர்மம் இருப்பதால் அவர் தற்கொலை செய்து கொண்டாரா? அல்லது அவரது சாவிற்கு வேறு ஏதேனும் காரணங்கள் உள்ளனவா? என்ற கோணத்தில் விசாரிக்க கள்ளக்குறிச்சி சார் ஆட்சியர் உத்தரவிட்டுள்ளார்.