'புதிய தேசியக் கல்விக் கொள்கையால் பள்ளி இடைநிற்றல் அதிகரிக்கும்' - அமைச்சர் பொன்முடி

மத்திய அரசின் கல்விக் கொள்கையில் 3, 5, 8 ஆம் வகுப்புக்கெல்லாம் பொதுத்தேர்வு என்று கூறுகிறார்கள். இதனால் பள்ளி இடைநிற்றல்தான் அதிகரிக்கும் என்று அமைச்சர் பொன்முடி கூறினார்.

சென்னை அண்ணாப் பல்கலைக்கழக உறுப்புக் கல்லூரிகளான ஆரணி, காஞ்சிபுரம், பண்ருட்டி, திண்டிவனம் மற்றும் விழுப்புரம் ஆகிய 5 கல்லூரிகளில் 2017-2021 ஆம் ஆண்டு பட்டம் முடித்த 1,114 மாணவ, மாணவிகளுக்கு பட்டமளிப்பு விழா விழுப்புரம் அரசு சட்டக் கல்லூரி வளாகத்தில் இன்று நடைபெற்றது.

அண்ணாப் பல்கலைக்கழக துணைவேந்தர் வேல்ராஜ் தலைமை தாங்கினார். உயர் கல்வித் துறை செயலாளர் கார்த்திகேயன், ஆட்சியர் மோகன் முன்னிலை வகித்தனர். சிறப்பு விருந்தினராக உயர் கல்வித் துறை அமைச்சர் பொன்முடி கலந்துகொண்டு பட்டங்களை வழங்கினார்.

பின்னர் நடைபெற்ற செய்தியாளர்கள் சந்திப்பில் பேசிய அமைச்சர் பொன்முடி, தேசிய கல்விக் கொள்கையில் சிலவற்றை சுட்டிக்காட்டி அதனை திருத்தி அமைக்க வேண்டும் என்ற கோரிக்கை தமிழ்நாடு அரசின் சார்பாக வைக்கப்பட்டது.

இதற்கு பதில் அளிக்கும் வகையில் மத்திய அரசிடம் இருந்து ஏதோ கடமைக்கு திருத்தம் செய்யப்பட்டது போன்ற ஒரு நகல் அனுப்பப்பட்டுள்ளது. நீட் தேர்வினை நீக்குவது தொடர்பாக தமிழ்நாடு அரசு தீவிர நடவடிக்கை மேற்கொண்டு வருகிறது. மேலும் நீதிமன்ற உதவியுடன் விரைவில் நீக்கப்படும்.

மேலும் இந்த ஆண்டு முதல் கலை மற்றும் அறிவியல் கல்லூரிகளில் முதல் மற்றும் இரண்டாம் ஆண்டிற்கான பாடப்பிரிவில் தமிழ் பாடப்பிரிவு சேர்க்கப்பட்டு பாடங்கள் நடத்தப்படும். அதேபோல் பொறியியல் கல்லூரிகளிலும் முதல் மற்றும் இரண்டாம் செமஸ்டர்களில் முறையே தமிழ் பாடமானது இணைந்து நடத்தப்படும்.

இந்தியா ஜாதி மத இன மொழி கடந்த ஒரு மதச்சார்பற்ற நாடு. இந்திய அரசியலமைப்புச் சட்டமே மதச்சார்பற்ற கொள்கையை அடிப்படையாக வைத்தே உருவாக்கப்பட்டது.

இப்படி உருவாக்கப்பட்ட இந்திய அரசியலமைப்புச் சட்டத்தை எதிர்த்து பேசுவது ஒரு மிகப்பெரிய தவறான செயல்.
ஆனால் தமிழ்நாடு ஆளுநர் உலகில் மற்ற நாடுகள் மதத்தை சார்ந்து இருக்கின்றன. அதைப் போன்று இந்தியாவும் மதத்தை சார்ந்து இருக்க வேண்டும் என்று கூறியிருக்கிறார். உச்சபட்ச அதிகாரத்தில் இருக்கும் ஆளுநர் ஒருவரே இந்திய அரசியலமைப்புச் சட்டத்தை எதிர்த்து இவ்வாறாக பேசுவது கண்டிக்கதக்கது.

பாஜக தங்கள் தரப்பு ஆளுநர்களை வைத்து ஆளும் அரசுக்கு எதிராக இடைஞ்சல்களை கொடுக்கிறது.

எடுத்துக்காட்டாக மேற்கு வங்காளத்தில் ஆளுநராக இருந்தவர் அம்மாநில அரசுக்கு எதிராக தொடர்ந்து செயல்பட்டு வந்ததால் அவருக்கு பதவி உயர்வு தரும் விதமாக துணை குடியரசுத் தலைவர் பதவியை மத்திய அரசு கொடுத்து அழகு பார்த்தது.

அதேபோன்று தமிழ்நாடு ஆளுநர் அவர்களுக்கும் இது போன்ற எண்ணம் ஏதேனும் இருக்கின்றதா என தெரியவில்லை. தானும் உயர் பதவிக்கு வரவேண்டும் என்பதற்காக தொடர்ந்து தமிழ்நாடு அரசுடன் மோதல் போக்கை கடைபிடித்து வருகிறாரோ என தோன்றுகிறது என்று கூறினார்.

இதையும் படிங்க: செம்மஞ்சேரியில் வெள்ளநீர் தேங்கவில்லை - அமைச்சர் மா.சுப்பிரமணியன்