இளைஞர்களே வேலைவாய்ப்பு பயிற்சி முகாம்களை பயன்படுத்திக் கொள்ளுங்கள் - நிலோபர் கபில்

வேலூர்: வேலைவாய்ப்புகள் எளிதாக கிடைக்க இளைஞர்கள் தமிழ்நாட்டில் உள்ள வேலைவாய்ப்பு பயிற்சி மையங்களைப் பயன்படுத்திக் கொள்ள வேண்டும் எனத் தொழிலாளர் நலத் துறை அமைச்சர் நிலோபர் கபில் தெரிவித்தார்.

வேலூர் மாவட்டம் ஜோலார்பேட்டையில் இன்று வேலைவாய்ப்புத் துறை, மாநில ஊரக வாழ்வாதார இயக்கம் ஆகியவை சார்பாக நடத்தப்பட்ட வேலை வாய்ப்பு முகாமை மாநில வணிகவரித் துறை அமைச்சர் கே.சி. வீரமணி, தொழிலாளர் நலத் துறை அமைச்சர் நிலோபர் கபில் ஆகியோர் கலந்துகொண்டு தொடங்கிவைத்தனர்.

இந்தப் பயிற்சி முகாமில் நூற்றுக்கும் மேற்பட்ட தனியார் நிறுவனங்கள் பங்குபெற்றன. இதில் பேசிய அமைச்சர் நிலோபர் கபில், "படித்த இளைஞர்களுக்கு போதிய பயிற்சி இல்லாத காரணத்தினால் பல்வேறு இடங்களில் வேலைவாய்ப்பு கிடைக்காமல் உள்ளது.

தமிழ்நாட்டில் அரசு சார்ந்த 89 தொழிற்பயிற்சி நிலையங்களும் தனியார் சார்பில் 476 தொழிற்பயிற்சி நிலையங்களும் செயல்பட்டுவருகின்றன. அதில் இணைந்து இளைஞர்களும் மாணவர்களும் பயிற்சி எடுத்துக்கொள்ளலாம். தொழிற்பயிற்சி நிலையங்களில் 55 பொறியியல் சார்ந்த படிப்புகள், 28 பாடப்பிரிவுகள் என பல்வேறு விதமான தொழில் பயிற்சி சார்ந்த பாடப்பிரிவுகளும் உள்ளன. இதனை மாணவர்கள் பயன்படுத்திக் கொள்ள வேண்டும்.

தமிழ்நாட்டிலுள்ள தொழில் பயிற்சி நிலையங்களில் பெண்களுக்கு வயது வரம்பு இல்லை என்பதால் பெண்கள் அதிகளவில் தொழில் பயிற்சி நிலையங்களில் சேர்ந்து பயன்பெற வேண்டும்.

படித்து முடித்த பின் மாணவர்கள் எங்கு வேலை செய்ய வேண்டும், எப்படி வேலை செய்ய வேண்டும் என்பதைத் தெரிவிக்கும் விதமாக தமிழ்நாட்டில் உள்ள அனைத்து வேலைவாய்ப்பு மையங்களும் தொழில் வழி நெறிகாட்டும் மையங்களாக மாற்றப்பட்டுள்ளன.

மேலும் அனைத்து மாவட்ட வேலைவாய்ப்பு அலுவலகங்களும் ஒவ்வொரு வார வெள்ளிக்கிழமையன்றும் வேலைவாய்ப்பு முகாம் நடத்தப்படுவதை இளைஞர்கள் பயன்படுத்த வேண்டும்" என்றார்.

இதையும் படிங்க: பொருளாதார மந்த நிலை - வேலையில்லாத நாட்களை அறிவித்த பிரிக்கால் நிறுவனம்!