திருவள்ளூர் 'வைரல் ஆசிரியர்' மீது பெண் போலி புகார்?

திருவள்ளூர்: திருவள்ளூரைச் சேர்ந்த ஆசிரியர் பகவான் மீது, அவரது உறவுக்கார பெண் போலிப் புகார் அளித்தாரா என்ற சந்தேகம் எழுந்துள்ளது.

திருவள்ளூர் மாவட்டம் பள்ளிப்பட்டு அருகே வெளியகரம் அரசு உயர்நிலைப் பள்ளியில் ஆங்கில ஆசிரியராகப் பணியாற்றி வருபவர் கோவிந்த் பகவான் (32). கடந்தாண்டு பகவான் பணியிட மாற்றம் செய்யப்பட்டபோது, மாணவ, மாணவிகள் ஆசிரியர் பகவானை அங்கிருந்து செல்லக்கூடாது என்று தடுத்து, கட்டிப்பிடித்து அழுதனர். இக்காட்சி சமூகவலைத் தளங்களில் வைரல் ஆனதைத் தொடர்ந்து பகவான் அனைவரது கவனத்தையும் பெற்றார். அதைத் தொடர்ந்து, அவருக்கான பணியிட மாறுதல் உத்தரவும் ரத்து செய்யப்பட்டது.

இந்நிலையில், ஆசிரியர் பகவான் வசிக்கும் பொம்மராஜுபேட்டையில் உள்ள அவரது மாமா முறை உறவினர் நாதமுனியின் மகள் கவிதா என்ற பெண், தன்னை காதலித்து திருமணம் செய்வதாக கூறி பகவான் தன்னை ஏமாற்றி விட்டு தற்போது வேறு ஒரு பெண்ணுடன் திருமணம் செய்ய உள்ளதாக திருத்தணி காவல் நிலையத்தில் புகார் அளித்திருத்தார்.

இதைத் தொடர்ந்து காவல் துறையினர் ஆசிரியர் பகவானிடம் தீவிர விசாரணை மேற்கொண்டனர். அப்போது, அவர் தனது உறவுக்கார பெண்ணை திருமணம் செய்யுமாறு தன் பெற்றோர் கூறியதற்கு மறுப்பு தெரிவித்தேன். இதையடுத்து, தற்போது எனக்கு வேறு ஒரு பெண்ணுடன் திருமணம் நிச்சயிக்கப்பட்டுள்ள நிலையில், என் மீது களங்கம் ஏற்படுத்தும் நோக்கில் இந்த பொய்ப் புகாரை அளித்துள்ளனர்.

இந்த புகாரின் மீதான விசாரணையில் மருத்துவப் பரிசோதனைக்கும் தான் தயாராக இருப்பதாக அவர் கூறியுள்ளார். அப்பெண் பரிசோதனைக்கு கால அவகாசம் கோரியதையடுத்து, அவருக்கு 10 நாட்கள் அவகாசம் அளித்து காவல்துறையினர் அனுப்பி வைத்தனர். எனவே,மாணவர்களின் மனதில் இடம்பிடித்த ஆசிரியர் பகவான் மீது அப்பெண் போலிப் புகார் அளித்தாரா என்ற சந்தேகம் எழுந்துள்ளது.