’சசிகலாவை நம்பி தொண்டர்களோ, தலைவர்களோ இல்லை’ - கே.சி. வீரமணி

வேலூர்: சசிகலா சிறையிலிருந்து வெளியே வந்தாலும் எங்களுக்கு எந்த பாதிப்பும் இல்லை என அமைச்சர் கே.சி. வீரமணி தெரிவித்துள்ளார்.

வேலூர் மாவட்டம் திருப்பத்தூர் பகுதியிலிருந்து சென்னைக்கு புதிய குளிர்சாதன சொகுசுப் பேருந்தை அமைச்சர் கே.சி. வீரமணி கொடியசைத்து தொடங்கிவைத்தார். பின்னர் குளிர்சாதன சொகுசுப் பேருந்தை சிறிது தூரம் அமைச்சர் ஓட்டிச்சென்றார்.

தொடர்ந்து செய்தியாளர்களிடம் பேசிய அமைச்சர் கே.சி. வீரமணி, ”பாதாளசாக்கடை திட்டத்திற்காக ஜெயலலிதா பத்து கோடி ரூபாய் ஒதுக்கி இருந்தார். அதன் தொடர்ச்சியாக இந்த அரசு ஐந்து கோடி ரூபாய் ஒதுக்கி பாதாள சாக்கடை திட்டத்தை நிறைவேற்றவும், பழுதடைந்த சாலைகளை சரி செய்யவும் துரிதமாக பணிகள் செயல்பட்டு விரைவில் பணியை முடித்துவிடுவோம்” என்று கூறினார்.

ஏற்கனவே இருந்த கூட்டணி உள்ளாட்சித் தேர்தலிலும் தொடரும் என்றும் நடந்து முடிந்த தேர்தலில் திமுக பொய்யான வாக்குறுதிகளை கொடுத்து மக்களை ஏமாற்றி இருந்தார்கள் உள்ளாட்சித் தேர்தலிலும் இப்படித்தான் இருக்கும் எனவும் அமைச்சர் தெரிவித்தார்.

மேலும், சசிகலா சிறையிலிருந்து வெளியே வந்தாலும் கட்சிக்கோ, ஆட்சிக்கோ எந்த பாதிப்பும் இல்லை என்றும் சசிகலாவை நம்பி தொண்டர்களோ, தலைவர்களோ இல்லை எனவும் கே.சி. வீரமணி தெரிவித்தார்.

இதையும் படிங்க: ஆபத்தை உணராது அதிவேக போட்டிபோடும் தனியார் பேருந்துகள்: பயணிகள் கிலி!