வீட்டில் தனியாக இருந்த மூதாட்டி கொலை!

வேலூர்: குடியாத்தம் அருகே வீட்டில் தனியாக இருந்த மூதாட்டியின் தலையில் அடையாளம் தெரியாத நபர் ஒருவர் கல்லால் அடித்துக் கொன்ற சம்பவம் அப்பகுதியில் பெரும் பரபரப்பை ஏற்படுத்தியுள்ளது.

குடியாத்தம் அடுத்த தாட்டிமானபள்ளி கிராமத்தைச் சேர்ந்த நாராயண சுவாமி என்பவரது மனைவி வனரோஜா (65). இவருக்கு ஒரு மகன் ஒரு மகள் உள்ளனர். மகளுக்கு திருமணமாகி வெளியூரில் இருக்கிறார்.

வனரோஜாவின் கணவர் சில ஆண்டுகளுக்கு முன்பு இறந்துவிட்ட நிலையில் அவரது மகனும் கடந்த சில ஆண்டுகளுக்கு முன்பு மரணமடைந்தார்.

இதனிடையே, மருமகளும் மாமியாரும் அருகருகே தனித்தனியாக வசித்து வந்துள்ளனர். இந்நிலையில், நேற்று முன்தினம் இரவு, அருகிலுள்ள கல்லபாடி என்னும் ஊரில் திருவிழா நடைபெற்றது.

அதைக் காண அனைவரும் சென்றுள்ளனர். அப்போது, அடையாளம் தெரியாத நபர் ஒருவர் வீட்டில் தனியாக இருந்த வனரோஜாவை பாலியல் வன்புணர்வு செய்ய முயற்சி செய்துள்ளார். பின்னர் கல்லால் தலையில் தாக்கியதில் வனரோஜா பரிதாபமாக உயிரிழந்தார்.

வனரோஜா முதியோர் ஓய்வூதியத்தில் வந்த பணம், மரங்களை விற்ற பணம் என சுமார் ஐயாயிரம் ரூபாய் வைத்திருந்தாகக் கூறப்படுகிறது. இந்தப் பணத்தை திருடுவதற்காக இந்தக் கொலை நடந்திருக்கலாம் என்றும், பாலியல் வன்புணர்வு முயற்சி நடந்திருப்பதாகவும் காவல் துறையினர் மேற்கொண்ட முதற்கட்ட விசாரணையில் தெரியவந்துள்ளது.

வனரோஜாவின் உடல் மீட்கப்பட்டு உடற்கூறாய்வுக்காக அரசு மருத்துவமனைக்கு அனுப்பிவைக்கப்பட்டுள்ளது.

இக்கொலை குறித்து வழக்குப்பதிவு செய்துள்ள காவல் துறையினர், அதே பகுதியைச் சேர்ந்த சரவணன் என்பவரிடம் சந்தேகத்தின் பேரில் விசாரணை மேற்கொண்டு வருகின்றனர்.

இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.