திருப்பத்தூரில் பறக்கும் படையினர் அதிரடி - ரூ. 3,50,000 பறிமுதல்!

வேலூர்: திருப்பத்தூரில் உரிய ஆவணங்கள் இன்றி கொண்டு செல்லப்பட்ட 3 லட்சத்து 50 ஆயிரம் ரூபாயை தேர்தல் பறக்கும் படையினர் பறிமுதல் செய்தனர்.

வேலூர் மாவட்டம் திருப்பத்தூர் அடுத்த பசிலிக்குட்டை பகுதியைச் சேர்ந்தவர் கிருஷ்ணன். இவர் கர்நாடக மாநிலம் பெங்களூரில் கட்டுமான பணியின் ஒப்பந்தாரராக உள்ளார். இந்நிலையில், ஊழியர்களுக்கு சம்பளம் கொடுப்பதற்காக திருப்பத்தூரிலிருந்து பெங்களூருக்கு தனது காரில் சென்றுகொண்டிருந்த போது திருப்பத்தூர் - கிருஷ்ணகிரி சாலையில் ரோந்து பணியில் ஈடுபட்டிருந்த தேர்தல் பறக்கும் படையினர் காரை நிறுத்தி சோதனை மேற்கொண்டனர்.

அப்போது, உரிய ஆவணங்கள் இன்றி எடுத்துச் செல்லப்பட்ட 3 லட்சத்து 50 ஆயிரம் ரூபாயை பறக்கும் படையினர் பறிமுதல் செய்தனர். இதனையடுத்து, அத்தொகையை திருப்பத்தூர் தாசில்தார் அனந்தகிருஷ்ணனிடம் அலுவலர்கள் ஒப்படைத்தனர்.