புத்தாண்டுப் பரிசாக லஞ்சம் பெற்ற இணை ஆணையர் : அதிரடி காட்டிய லஞ்ச ஒழிப்புத் துறையினர்!

வேலூர் : மாநில வரித்துறை இணை ஆணையர் அலுவலகத்தில் லஞ்ச ஒழிப்புத் துறையினர் மேற்கொண்ட திடீர் சோதனையில், இணை ஆணையர் அறையிலிருந்து புத்தாண்டுப் பரிசாக அவர் பெற்ற கணக்கில் வராத ஒரு லட்சத்து 50 ஆயிரம் ரூபாய் ரொக்கம் பறிமுதல் செய்யப்பட்டது.

வேலூர் கோட்டை சுற்று சாலையில் அமைந்துள்ள மாநில வரித்துறை அலுவலகத்தில், மாநில வரித்துறை இணை ஆணையராக காஞ்சிபுரத்தை சேர்ந்த விமலா (42) என்பவர் பணியாற்றி வருகிறார். இவர் கூடுதலாக நுண்ணறிவுப் பிரிவு, பொது நிர்வாகம் ஆகியவற்றையும் கவனித்து வருகிறார். இவரின் கட்டுப்பாட்டின்கீழ் ஒருங்கிணைந்த வேலூர், கடலூர், திருவண்ணாமலை, விழுப்புரம் ஆகிய மாவட்டங்கள் உள்ளன.

இந்நிலையில் நேற்று (டிச. 29) வேலூர், திருவண்ணாமலை மாவட்ட உதவி ஆணையர்கள், மாநில வரி அலுவலர்களுக்கான பயிற்சி நடைபெற்றது. இதில் சுமார் 50 பேர் வரை பங்கேற்றனர். இப்பயிற்சி முடிவில் புத்தாண்டையொட்டி பணம், பரிசு பொருள்கள் உள்ளிட்டவற்றை இணை ஆணையர் பெறவிருப்பதாக வேலூர் மாவட்ட லஞ்ச ஒழிப்புத் துறையினருக்கு ரகசியத் தகவல் கிடைத்துள்ளது.

இந்தத் தகவலின் அடிப்படையில், வேலூர் லஞ்ச ஒழிப்புத் துறை டிஎஸ்பி ஹேமசித்ரா தலைமையிலான லஞ்ச ஒழிப்புத் துறையினர், மாநில வரித்துறை இணை ஆணையர் அலுவலகத்தில் திடீர் சோதனை மேற்கொண்டனர். அப்போது புத்தாண்டுப் பரிசாக ரொக்கப்பணம், சால்வை, இனிப்புகள், டைரிகள் உள்ளிட்ட பொருள்கள் அவரால் பெறப்பட்டது தெரியவந்தது.

தொடர்ந்து மேற்கொள்ளப்பட்ட சோதனையில், இணை ஆணையர் விமலாவின் அறையிலிருந்து கணக்கில் வராத ஒரு லட்சத்து 50 ஆயிரம் ரூபாய் ரொக்கப்பணம் கண்டெடுக்கப்பட்டு பறிமுதல் செய்யப்பட்டது‌.

தொடர்ந்து சுமார் ஏழு மணி நேரம் வரை இணை ஆணையர் அலுவலகத்தில் லஞ்ச ஒழிப்புத் துறையினர் சோதனை மேற்கொண்டனர். மேலும் இதுகுறித்து அவர்கள் வழக்குப் பதிவு செய்து விசாரணை மேற்கொண்டும் வருகின்றனர்.