மாநில எல்லை விவசாய நிலத்தில் 16 யானைகள்: விரட்டும் பணி வனத் துறை

வேலூர்: தமிழ்நாடு-ஆந்திர எல்லைப் பகுதிகளில் 16 காட்டு யானைகள் புகுந்து பயிர்களைச் சேதப்படுத்துவதால், அவற்றை விரட்டும் பணியில் வனத் துறையினர் ஈடுபட்டுள்ளனர்.

வேலூர் மாவட்டம் தமிழ்நாடு-ஆந்திர எல்லையில் அமைந்துள்ள குடியாத்தம் பகுதியை அடுத்த சைனகுண்டா, தணகொண்பல்லி, மோடிகுப்பம், வலசை உள்ளிட்டப் பகுதிகள் வனப்பகுதியை ஒட்டியுள்ளப் பகுதிகளாகும். அதனால் அப்பகுதிகளுக்கு காட்டு யானைகள் அடிக்கடி உணவு தேடிவந்து விவசாய நிலப் பயிர்களை நாசம் செய்துவருகின்றன.

அதைத்தொடர்ந்து கடந்த சில நாள்களாக 16 காட்டு யானைகள் அப்பகுதிகளில் உள்ள விவாசாய நிலங்களில் புகுந்து பயிர்களை நாசம் செய்துவந்தன. அதனால் அப்பகுதி மக்கள் வனத் துறையினருக்குத் தகவல் தெரிவித்தனர். அதையடுத்து வனத் துறையினர் யானைகளை வனப்பகுதிக்குள் விரட்டியடித்தனர்.

இந்த நிலையில் விரட்டப்பட்ட காட்டு யானைகள் இன்று அதிகாலை மீண்டும் வந்து விவசாய நிலங்களை நாசப்படுத்திவருகின்றன. தகவலறிந்து வந்த குடியாத்தம் வனத் துறையினர் யானைகளை வனப்பகுதிக்குள் விரட்டும் பணியில் ஈடுபட்டுவருகின்றனர்.

இதுகுறித்து அப்பகுதி மக்கள் கூறுகையில், "கோடை காலத்தில் தண்ணீர், உணவுத் தேடிவரும் யானைகளை வனத் துறையினர் வனப்பகுதிக்குள் முழுமையாக விரட்டாமல், அவைகளை அப்போதைக்கு மோர்தான அணை பக்கம் விரட்டுகின்றனர். அதனால் அவை மீண்டும் வருகின்றன" எனத் தெரிவித்தனர்.

இதையும் படிங்க: விளைநிலங்களை சூறையாடும் யானைகள்!