'டிடிவி தினகரன் முதலமைச்சராக வந்தால் தமிழ்நாடு முன்னேறும்'- முஸ்லீம் லீக் கட்சித் தலைவர் முஸ்தபா

திருச்சி: டிடிவி தினகரன் முதலமைச்சராக வந்தால் மட்டுமே தமிழ்நாடு முன்னேறும் என தமிழ்நாடு முஸ்லீம் கட்சியின் தலைவர் முஸ்தபா தெரிவித்துள்ளார்.

அமமுகவின் அகில உலக செயல்வீரர்கள் அறிமுகக்கூட்டம் இன்று திருச்சி மத்தியப் பேருந்து நிலையம் அருகேயுள்ள தனியார் ஹோட்டலில் நடைபெற்றது. இந்தக் கூட்டத்தில் கட்சியின் கொள்கைபரப்புச் செயலாளர் செய்யார் சரஸ்வதி, அமைப்புச் செயலாளர்கள் மனோகர், சாருபாலா தொண்டைமான், மாவட்டச் செயலாளர்கள் சீனிவாசன், ராஜசேகர் உள்ளிட்டோர் கலந்துகொண்டனர்.

இக்கூட்டத்தில் துபாயில் உள்ள கட்சி நிர்வாகிகளுடன் வீடியோ கான்பரன்ஸ் மூலம் உரையாடப்பட்டது. இக்கூட்டத்தில் கலந்துகொண்டு பேசிய தமிழ்நாடு முஸ்லீம் லீக் கட்சியின் மாநிலத் தலைவர் முஸ்தபா, ”தமிழ்நாட்டின் முதலமைச்சராக இருக்கும் ஈபிஎஸ், துணை முதலமைச்சராக இருக்கும் ஓபிஎஸ் ஆகியோர் ஒரு பிரயோஜனமும் இல்லாதவர்கள்.

தமிழ்நாடு முதலமைச்சராக டிடிவி தினகரன் வந்தால் மட்டுமே தமிழ்நாடு முன்னேறும். மத்திய அரசு கொண்டு வந்த மக்கள் விரோத திட்டங்களை ஜெயலலிதா எப்படி தடுத்து நிறுத்தினாரோ, அதேபோல டிடிவி தினகரன் அத்தகையத் திட்டங்களைத் தடுத்து நிறுத்துவார். சிறுபான்மையினரை திமுக ஏமாற்றுகிறது" என்றார்.

இதையும் படிங்க: தமிழ்நாடு முதலமைச்சருடன் பினராயி விஜயன் விரைவில் சந்திப்பு