மணல் திருட்டு: முன்னாள் கவுன்சிலர் உள்பட 9 பேர் கைது!

திருச்சி: வளநாடு அருகே மணல் கொள்ளையில் ஈடுபட்ட அதிமுக முன்னாள் கவுன்சிலர் உள்பட ஒன்பது பேர் கைது செய்யப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.

திருச்சி மாவட்டம் வளநாடு அருகேயுள்ள மினிக்கியூர் பகுதி ஆற்று ஓடைகளில் மணல் கொள்ளை நடப்பதாக மாவட்ட காவல் கண்காணிப்பாளருக்கு ரகசியத் தகவல் கிடைத்துள்ளது. இதனையடுடுத்து டிஐஜி தலைமையிலான தனிப்படை காவல்துறையினர் மினிக்கியூர் பகுதியில் தீவிர வாகன தனிக்கையில் ஈடுபட்டனர்.

அப்போது அவ்வழியாக அனுமதியின்றி ஆற்று மணல் ஏற்றி வந்த லாரிகளை மடக்கி பிடித்து, ஓட்டுநர்களிடன் விசாரணை மேற்கொண்டனர். விசாரணையில், அப்பகுதி அதிமுக முன்னாள் கவுன்சிலர் பெருமாள்(55) உள்பட திருப்பதி, சதாசிவம், ரவிச்சந்திரன், தனபால், குமரேசன், ராசு, சங்கன், சதீஷ்குமார் உள்ளிட்ட்டோர் தொடர்ந்து மணல் கொள்ளையில் ஈடுபட்டு வந்தது தெரியவந்துள்ளது.

இதைத்தொடர்ந்து ஒன்பது பேரையும் கைது செய்த காவல்துறையினர், மணல் கடத்தலுக்கு பயன்படுத்திய ஜேசிபி, லாரி உள்ளிட்ட வாகனங்களையும் பறிமுதல் செய்து காவல் நிலையத்தில் ஒப்படைத்தனர்.

இதையும் படிங்க:வேகத்தடை அமைத்ததால் இரு சமூகத்தினரிடையே மோதல் - 3 பேர் படுகாயத்துடன் சிகிச்சை