"நீட் தேர்வெழுதும் மாணவர்களின் ஆடைகளை கிழிப்பதுதான் மத்திய அரசின் மாடல்?" - அமைச்சர் அன்பில் மகேஷ்!

DMK signature campaign against NEET Exam: நீட் தேர்வு எழுத வரும் மாணவர்களின் ஆடையை கிழித்தெரியும் மாடலாக மத்திய அரசின் மாடல் உள்ளதாகவும், நீங்கள் அனைவரும் சமம் என்று சீருடைகளை வழங்கி பள்ளிக்கு செல்லுங்கள் என வலியுறுத்தும் மாடலாக திராவிட மாடல் உள்ளது என்றும் அமைச்சர் அன்பில் மகேஷ் தெரிவித்தார்.

திருச்சி:திமுக சார்பில் நீட் தேர்வை ரத்து செய்ய வலியுறுத்தி திமுக இளைஞரணி, மருத்துவர் மற்றும் மாணவர் அணி சார்பில் மாபெரும் 'கையெழுத்து இயக்கம்' நடத்தப்பட்டது. இதனை சென்னையில் திமுக இளைஞரணி செயலாளரும் அமைச்சருமான உதயநிதி ஸ்டாலின் தொடங்கி வைத்தார்.

இதேபோல, திருச்சியில் திமுக சார்பில் நீட் தேர்வுக்கு எதிராக அமைச்சர் அன்பில் மகேஷ் பொய்யாமொழி கலந்து கொண்டு கையெழுத்து இயக்கத்தை துவக்கி வைத்தார். இதில், கட்சி பாகுபாடின்றி அனைத்து தரப்பினரும் ஒன்றுபட்டு நீட் தேர்வுக்கு எதிராக குரல் வேண்டும் எனக் அமைச்ச அன்பில் மகேஷ் பொய்யாமொழி கேட்டுக்கொண்டார்.

பின்னர் செய்தியாளர்களிடம் பேசிய அமைச்சர் அன்பில் மகேஷ் பொய்யாமொழி, "இட ஒதுக்கீடாக இருந்தாலும், இந்தி எதிர்ப்பாக இருந்தாலும், ஜல்லிக்கட்டு போராட்டமாக இருந்தாலும், நமது தமிழ்நாடு மாநில உரிமைகளை மீட்டெடுப்பதில் எப்பொழுதும் முதல் குரல் கொடுக்கும். கடந்த மாதம் நடந்த உண்ணாவிரதப் போராட்டமாக இருந்தாலும் சரி, கையெழுத்து இயக்கமாக இருந்தாலும் சரி அது சார்ந்த சட்டப்போராட்டத்திலும் முழுமையாக ஈடுபட்டுக் கொண்டிருக்கும் போது, கண்டிப்பாக வெற்றி கிடைக்கும்.

இந்தியா கூட்டணி வெற்றி பெறும்போது, 15 மாதத்தில் எய்ம்ஸ் மருத்துவமனையை கொண்டு வர முடியும். எல்லா வீட்டிற்கு விளக்கு கொண்டுவர முடியும் என மக்களிடம் கேட்டது போல நீட் தேர்வுக்கான விலக்கையும் பெற்று தருவோம். ஏற்கனவே, நீட் விலக்கு குறித்து நிறைவேற்றப்பட்ட தனி தீர்மானம் ஆளுநர் மாளிகையில் தூங்கிக் கொண்டிருந்தது.

இந்தப் பிரச்சினை ஆளுநருக்கும், மாநில அரசுக்கும் உள்ள ஈகோ பிரச்சினை கிடையாது. இது மருத்துவ கனவில் உள்ள மாணவ மாணவியர்களின் பிரச்சினை. இந்த விவகாரத்தில் மத்திய அரசு, நம் பக்கம் இல்லை என்கிற வேதனையும், பாரமும் உள்ளது. மத்திய அரசு நமக்கான அரசாக அமையும்போது, நாம் என்ன சொல்கிறோமோ? அதை, காது கொடுத்து அவர்கள் கேட்பார்கள்.

சமீபத்தில் வெளியான சிஏஜி அறிக்கை (CAG report) என்ன சொல்கிறது என்றால், தனியார் பயிற்சி வகுப்புகளுக்கு மறைமுகமாக அதிமுக அரசு உதவி செய்துள்ளது போல் காட்டுகிறது. நீட் மாணவர்களின் ஆடைகளை கிழிப்பதுதான் மத்திய அரசின் மாடல்?. திரிபுராவில் நீட் தேர்வு எழுதச் சென்ற குழந்தைகளின் உடைகள் எப்படி எல்லாம் கிழித்தெறியப்பட்டு, எப்படியெல்லாம் சோதனைக்கு உள்ளாக்கப்பட்டார்கள் என்பதை நாம் கண்கூடாக பார்த்தோம்.

ஆனால், புதிய ஆடைகளை கொடுத்து நீங்கள் அனைவரும் சமம் என்று பள்ளிக் கூடத்திற்கு செல்லச் சொல்வதுதான் திராவிட மாடல் அரசு. அவர்களின் மாடல் என்பது, உடைகளை கிழித்தெறியும் மாடலாக இருக்கிறது" என்று அமைச்சர் அன்பில் மகேஷ் பொய்யாமொழி தெரிவித்தார்.

இதையும் படிங்க:பாஜக கொடி கம்பம் அகற்றம் விவகாரம்: "100 நாட்களில் 100 கொடிக்கம்பங்கள் நடப்படும்" - அண்ணாமலை!