விமானத்தில் தங்கம் கடத்தியவர்கள் கைது

திருச்சி: விமானத்தில் தங்கம் கடத்தி வந்தவர்களை விமான நிலைய காவல்துறையினர் கைது செய்து விசாரணை மேற்கொண்டுவருகின்றனர்.

மலேசியா தலைநகர் கோலாலம்பூரிலிருந்து ஏர் ஏசியா மற்றும் மலிண்டோ விமானங்கள் திருச்சி விமான நிலையம் வந்தடைந்தது. இதில் பயணம் செய்த பயணிகளையும், அவர்களது உடமைகளையும் வான் நுண்ணறிவு பிரிவு அலுவலர்கள் சோதனையிட்டனர்.

அப்போது இளையான்குடியைச் சேர்ந்த தமீம் அன்சாரி, கடலூரைச் சேர்ந்த முகமது ரியாஸ், புதுக்கோட்டையைச் சேர்ந்த சாபுபரலி ஆகியோர் ரூ.31 லட்சம் மதிப்புள்ள தங்கத்தை விமானத்தில் கடத்தி வந்தது கண்டுபிடிக்கப்பட்டது.

இதனைத்தொடர்ந்து அவர்களைக் கைது செய்த விமானநிலைய காவல்துறையினர் அவர்களிடமிருந்து 957 கிராம் எடையுள்ள தங்க சங்கிலிகளை பறிமுதல் செய்தனர்.

மேலும், அவர்களிடம் மேற்கொண்ட விசாரணையில் கமிஷன் அடிப்படையில் இவர்கள் தங்க செயின்களை கடத்தி வந்தது தெரியவந்தது.