இவர் காட்டுல பண மழை தான்... ஒரே நாளில் 4 லட்சம் ரூபாய்க்கு தக்காளி விற்ற விவசாயி!

தக்காளி விலை விண்ணைத்தொடும் உச்சத்தில் இருக்கும் நிலையில், திருப்பூரை சார்ந்த விவசாயி தக்காளி விற்று, ஒரே நாளில் 4 லட்சம் ரூபாய் சம்பாதித்து சாதனைப் படைத்துள்ளார்.

திருப்பூர்:தாராபுரம், குண்டடம், பொங்கலூர், பல்லடம், மங்கலம், உடுமலை, மடத்துக்குளம் உள்ளிட்டப் பகுதிகளில் பிரதான தொழில் விவசாயம். இந்தப் பகுதிகளில் பல்வேறு வகை பயிர்கள் சாகுபடி செய்யப்பட்டது வழக்கம். இருந்த போதிலும், ஆண்டின் பெரும்பாலான நாட்களில் தக்காளி, வெங்காயம் ஆகியவைகளின் சாகுபடி தான் அதிக அளவில் நடந்து வருகிறது. இங்கு விளைவிக்கப்படும் தக்காளி திருப்பூர் மாவட்டத்தில் உள்ள சந்தைகளில் விற்பனை செய்யப்படுவதோடு, வெளி மாவட்டங்களுக்கும் அனுப்பப்பட்டு வருகிறது.

தற்போது தக்காளியின் விலை உச்சத்தில் இருக்கும் நிலையில், திருப்பூர் மாவட்ட விவசாயிகளுக்கு திருப்பூர் சந்தைகளில் விற்பதற்கே தக்காளி பற்றாக்குறையாக இருக்கும் நிலை உருவாகி உள்ளது. ஒரு கிலோ தக்காளி 100 ரூபாய் முதல் அதற்கு மேலாக விற்கப்படுவதால், திருப்பூர் சந்தைப்பேட்டை மார்க்கெட்டுக்கு வரும் தக்காளி விவசாயிகளும், விற்பனையாளர்களும் பெரும்மகிழ்ச்சியில் இருக்கின்றனர்.

ஒவ்வொரு ஆண்டும் தக்காளி விலை மிகவும் குறைந்து போய்விடும் போது, பெரும் அவதிக்கும் ஆளாகி அவற்றை விற்பனை செய்ய மனமில்லாமல் சாலையிலேயே கொட்டிச் சென்ற நிலையையும் திருப்பூர் மாவட்ட விவசாயிகள் அனுபவித்து இருக்கிறார்கள். ஆனால் தற்போது திருப்பூர் சுற்றுப்பகுதியில் தக்காளி பயிரிட்ட விவசாயிகளின் காட்டில் பணமழை என்பது அடைமழையாய் கொட்டி இருக்கிறது.

இதையும் படிங்க:தக்காளி விற்று 3 கோடி ரூபாய் வருமானம் - சித்தூர் விவசாயியின் சிறப்பான சிந்தனை!

தக்காளி விலை கடுமையாக ஏறியதால், தக்காளி விவசாயிகள் நல்ல லாபம் அடைந்து பெரும் மகிழ்ச்சியில் உள்ளனர். இந்நிலையில் குண்டடம் அடுத்த ஜோதியம்பட்டியைச் சேர்ந்தவர் விவசாயி வெங்கடேஷ் (27). தனக்குச் சொந்தமான பத்து ஏக்கர் நிலத்தில் கடந்த ஐந்து ஆண்டுகளாக தக்காளி விவசாயம் செய்து வந்துள்ளார். தக்காளியின் விலை ஏற்றமும் இறக்கமுமாக இருந்து வந்த நிலையில், இந்த ஆண்டுதான் தனக்கு நல்ல வருவாய் கிடைத்துள்ளதாகவும் தெரிவித்துள்ளார்.

குறிப்பாக இன்று ஒரே நாளில் 260 பெட்டிகளில் 15 கிலோ வீதம், 3 ஆயிரத்து 900 கிலோ தக்காளி அறுவடை செய்து வந்துள்ளதாகவும், ஒரு பெட்டி 1550 ரூபாய்க்கு விற்பனையாகி உள்ளது என்றும், மொத்தமாக 4 லட்சத்து 3 ஆயிரம் ரூபாய் வருவாயை ஒரே நாளில் தக்காளி விற்பனையின் மூலமாக ஈட்டியதில் பெரும் மகிழ்ச்சி அடைந்துள்ளார். விவசாயியான தங்களாலும் வருமானம் ஈட்ட முடியும் எனவும்; இந்த ஆண்டு தனக்கு மகிழ்ச்சி நிறைந்ததாக உள்ளதாகவும் அவர் தெரிவித்துள்ளார்.

இதையும் படிங்க:ஆகஸ்ட் 8ல் நம்பிக்கையில்லா தீர்மானம் மீது விவாதம்... ஆக.10 பிரதமர் மோடி விளக்கம் எனத் தகவல்!