திருப்பூர் : 35 ஆயிரம் விதைப்பந்துகளில் இந்திய வரைபடத்தை உருவாக்கிக் கொண்டிருந்தார் சர்வேஷ் என்ற மாணவர். 10 நிமிடங்களில் 126 யோகா முத்திரைகளை செய்து அசத்தினார் 3ஆம் வகுப்பு மாணவி சமுத்ரநதி. திரும்பிய பக்கமெல்லாம் மாணவர்களின் சாதனை முயற்சிகளால் நிரம்பி வழிந்தது, திருப்பூரில் உள்ள தனியார் பள்ளி. இக்கல்வி குழுமத்தின் 25ம் ஆண்டு விழாவையொட்டி, இந்த உலக சாதனை நிகழ்ச்சிகளுக்கு ஏற்பாடு செய்யப்பட்டிருந்தது.
12ஆம் வகுப்பு மாணவி ரிஷிகா பதானி தொடர்ச்சியாக 14 மணி நேரம் கரோனா பற்றி விரிவுரை வழங்கி உலக சாதனை நிகழ்த்தினார். 6ஆம் வகுப்பு மாணவன் சித்தார்த் 70 புத்தகங்களை தொடர்ச்சியாக 7 மணி நேரம் மதிப்பாய்வு செய்து உலக சாதனை நிகழ்த்தினார். 2 ஆம் வகுப்பு மாணவி சிரோஸ்ரீ நந்தன் தொடர்ச்சியாக 2 மணி நேரங்களில் 60 ஓவியங்களை வரைந்து உலகசாதனையை நிகழ்த்தினார்.
இதே போல, 7 ஆம் வகுப்பு மாணவி ஹேமாக்ஷா 326 ஓரிகாமி காகித வடிவங்களை 2 மணி நேரத்தில் செய்து காட்டி சாதனை நிகழ்த்தினார். 7 ஆம் வகுப்பு மாணவர் விதுர்வைபவ் என்பவர் 14 மணி நேரங்கள் தொடர்ச்சியாக 120 உணவு வகைகளை தயாரித்து சாதனை படைத்தார். 8 ம் வகுப்பு மாணவன் யோகேஷ் ஜோவி, 11ஆயிரத்து 400 காகித டம்ளர்களை அடுக்கி வைத்து பூமிக்காக மரம் நட வேண்டும் என்ற கருத்தினை வலியுறுத்தி உலக சாதனை நிகழ்த்தினார்.