தொடர் வங்கி விடுமுறை எதிரொலி - நைசாக புகுந்த கொள்ளையர்கள்!

திருப்பூர்: பல்லடம் அருகே ஸ்டேட் வங்கியில் ஜன்னலை உடைத்து கொள்ளை முயற்சியில் கொள்ளையர்கள் ஈடுபட்டுள்ளனர்.

பல்லடத்தை அடுத்த கே.கள்ளப்பாளையத்தில் இயங்கி வரும் பாரத ஸ்டேட் வங்கியில் சனிக்கிழமையன்று பணி முடிந்ததும் அலுவலர்கள் வங்கியை பூட்டி விட்டுச் சென்றுள்ளனர். ஞாயிறு முதல் ஆயுதபூஜை, விஜயதசமி என தொடர் விடுமுறை தினம் என்பதால் இன்று காலை மீண்டும் பணிக்குத் திரும்பிய அலுவலர்கள் வங்கியைத் திறந்து பார்த்துள்ளனர். அப்போது ஏடிஎம் இயந்திரம் வேறு இடத்தில் இருப்பதைக் கண்டு அதிர்ச்சியடைந்தனர்.

வங்கியின் ஜன்னல் கம்பிகள் அறுக்கப்பட்டு கொள்ளையர்கள் வங்கியில் புகுந்தது தெரிய வந்தது. வங்கியைச் சுற்றி போடப்பட்டுள்ள முள்வேலிகளைத் துளையிட்டு கொள்ளையர்கள் உள்ளே நுழைந்து திருட முயற்சித்துள்ளனர்.

வங்கிகொள்ளை முயற்சி குறித்து அலுவலர்கள் காமநாயக்கன்பாளையம் காவல்துறையினருக்குத் தகவல் அளித்தனர். விரைந்து வந்த காவல்துறையினர் மற்றும் கைரேகை நிபுணர்கள் வங்கியில் விசாரணை நடத்தினர். பணம் நகைகள் ஏதேனும் திருடப்பட்டுள்ளதா என தொடர்ந்து விசாரணை நடைபெற்று வருகிறது.

இதையும் படிங்க:முகமூடியாய் மாறிய குப்பைக் கூடை - கொள்ளையர்களின் புதிய அவதாரம்!