வீட்டின் மேற்கூரையைப் பிரித்து திருட முயன்றவர்கள் காவல் துறையில் ஒப்படைப்பு!

திருப்பத்தூர்: ஆம்பூரில் பட்டப்பகலில் வீட்டின் மேற்கூரையைப் பிரித்து திருட முயன்று உள்ளே இறங்கிய இரண்டு நபர்களைப் பொதுமக்கள் பிடித்து காவல் துறையினரிடம் ஒப்படைத்தனர்.

திருப்பத்தூர் மாவட்டம் ஆம்பூர் முககொல்லைப் பகுதியில் வசித்துவருபவர் தாமரை. இவர் வீட்டைப் பூட்டிவிட்டு வெளியில் சென்றுள்ளதை நோட்டமிட்ட அடையாளம் தெரியாத நபர்கள் இருவர், அவர் வீட்டின் மேற்கூரையைப் பிரித்து உள்ளே சென்று வீட்டில் வைக்கப்பட்டிருந்த பொருள்களைத் திருடிக் கொண்டு தப்பி ஓட முயன்றபோது அப்பகுதி பொதுமக்கள் விரட்டிப் பிடித்தனர்.

வீட்டின் மேற்கூரை பிரிக்கப்பட்ட காட்சி

திருடர்களைப் பிடித்த பொதுமக்கள்

திருடர்களை கைதுசெய்த காவல் துறையினர்

பின்னர், சம்பவம் குறித்து நகர காவல் துறையினருக்குத் தகவல் அளிக்கப்பட்டது. அதன்பேரில் சம்பவ இடத்திற்கு வந்த காவலர்களிடம் அவர்களைப் பொதுமக்கள் ஒப்படைத்தனர்.

காவல் துறையினர் விசாரித்ததில் அவர்கள் வாணியம்பாடி பகுதியைச் சேர்ந்த சங்கர், சுரேஷ் என்று தெரியவந்தது. சம்பவம் குறித்து காவல் துறையினர் வழக்குப்பதிவு செய்து பிடிபட்ட இருவரிடம் தொடர்ந்து விசாரணை மேற்கொண்டுவருகின்றனர்.

இதையும் படிங்க:செல்போன் திருடியவருக்கு அடிகொடுத்து போலீசிடம் ஒப்படைத்த பொதுமக்கள்!