4 பிரிவுகளாக உள்ள அதிமுகவால் தொண்டர்களுக்கு என்ன பயன்? - துரை வைகோ கேள்வி

'நான்கு பிரிவுகளாக இருக்கும் அதிமுகவினால் யாருக்கு நன்மை என்பதை தொண்டர்கள் புரிந்து செயல்பட வேண்டும்' மதிமுக தலைமை நிலைய செயலாளர் துரை வைகோ தெரிவித்துள்ளார்.

திருப்பத்தூர்: மதிமுக மாநில தலைமை செயற்குழு உறுப்பினர் காளிலிங்கம் இல்லத் திருமண விழாவிற்கு வருகை தந்த மதிமுக தலைமை நிலைய செயலாளர் துரை வைகோ செய்தியாளர்களைச் சந்தித்தார். அப்போது பேசிய அவர், ''எம்ஜிஆரால் கண்டெடுக்கப்பட்டு கட்டுக்கோப்பாக வளர்க்கப்பட்ட அதிமுக நான்கு பிரிவுகளாக இருக்கிறது. இதனால் யாருக்கு நன்மை ஏற்படும் என்பதை உணர்ந்து தொண்டர்கள் செயல்பட வேண்டும்.

மத்திய அரசின் பட்ஜெட் ஏமாற்றம் அளிப்பதாக இருக்கிறது. மொத்தத்தில் தேர்தலுக்காக காத்திருக்கும் மாநிலங்களுக்கான பட்ஜெட்டாகவும், தமிழ்நாட்டை புறக்கணிப்பதற்கான பட்ஜெட்டாகவும் இருக்கிறது. அதுமட்டுமின்றி விவசாயிகளின் குறைந்தபட்ச ஆதார விலை, உரங்களுக்கான விலை குறைவு உள்ளிட்ட எந்த அறிவிப்பும் இல்லாமல் ஏமாற்றம் அளிக்கிறது. பாஜக ஆட்சியில் 400 மடங்கு உரங்களின் விலை உயர்வு ஏற்பட்டுள்ளது'' எனக் கூறினார். அதனைத் தொடர்ந்து புதுக்கோட்டை வேங்கை வயல் சம்பவம் குறித்து கேள்வி எழுப்பப்பட்டது.

இதற்குப் பதிலளித்த துரை வைகோ, '' வேங்கை வயல் சம்பவம் மனிதநேயமற்ற செயல். மிருகங்கள் கூட இவ்வாறு செய்யாது. சாதி, மதங்களைக் கடந்து மனிதநேயத்துடன் செயல்பட வேண்டும். மாறாக, இது போன்ற சம்பவங்களை ஊக்குவிக்கும் இயக்கங்களையும் கட்சிகளையும் மக்கள் ஆதரிக்கக் கூடாது'' எனத் தெரிவித்தார். பின்னர் ஈரோடு கிழக்கு இடைத்தேர்தல் குறித்து பேசிய அவர், "இந்த இடைத்தேர்தலில் ஈ.வி.கே.எஸ் இளங்கோவன் பெருவாரியான வாக்கு வித்தியாசத்தில் வெற்றி பெறுவார்'' எனத் தெரிவித்தார்.

இதையும் படிங்க:Erode East By Poll: பொது வேட்பாளரை நிறுத்த பாஜக முயற்சி!