'கூட்டுறவுத் துறையில் காலியாக உள்ள பணியிடங்கள் விரைவில் நிரப்பப்படும்'

துாத்துக்குடி: கூட்டுறவுத் துறையில் காலியாக உள்ள பணியிடங்கள் விரைவில் நிரப்பப்படும் என தமிழ்நாடு கூட்டுறவுத் துறை அமைச்சர் செல்லூர் ராஜு தெரிவித்துள்ளார்.

துாத்துக்குடி மாவட்டம் கோவில்பட்டி லாயல் மில் காலனியில் அம்மா சிறு கூட்டுறவு சிறப்பு அங்காடி திறப்பு விழா - வானரமுட்டியில் மத்திய கூட்டுறவு வங்கி கிளை, அம்மா சிறு கூட்டுறவு சிறப்பு அங்காடி திறப்பு விழா நடைபெற்றது. இந்த விழாவிற்கு மாவட்ட ஆட்சியர் சந்தீப் நந்தூரி தலைமை வகித்தார்.

இதில் தமிழ்நாடு கூட்டுறவுத் துறை அமைச்சர் செல்லூர் ராஜு, செய்தி விளம்பரத் துறை அமைச்சர் கடம்பூர் ராஜு ஆகியோர் கலந்துகொண்டு திறந்துவைத்தனர். தொடர்ந்து வானரமுட்டியில் நடைபெற்ற விழாவில் பள்ளி மாணவ, மாணவிகளுக்கு இலவச மடிக்கணினிகள், 794 பயனாளிகளுக்கு ஐந்து கோடியே 93 லட்சத்து 33 ஆயிரம் ரூபாய் மதிப்பீட்டில் நலத்திட்ட உதவிகளை அமைச்சர்கள் வழங்கினர்.

இதைத்தொடர்ந்து அமைச்சர் செல்லூர் ராஜு செய்தியாளர்களிடம் பேசுகையில், விவசாயிகளுக்கு வழங்கப்பட்ட விவசாயக் கடன்களுக்கு ரூ.1257 கோடி வட்டியை மானியமாக தமிழ்நாடு அரசு கொடுத்துள்ளதை சுட்டிக்காட்டினார். விவசாயிகள் ஓராண்டுக்குள் கடனை செலுத்திவிட்டால் வட்டி வசூலிக்கப்படுவதில்லை என்று சொன்ன அவர், நியாயவிலைக் கடைகளில் அனைத்துப் பொருட்களும் மக்களுக்கு வழங்கப்பட்டுவருவதாகத் தெரிவித்தார்.

அப்படி எந்தக் கடையிலும் பொருட்கள் கிடைக்கவில்லை என்று புகார் இருந்தால் சம்பந்தப்பட்டவர்கள் மீது நடவடிக்கை எடுக்கப்படும் என உறுதியளித்த செல்லூர் ராஜு, கூட்டுறவுத் துறையில் காலியாக உள்ள பணியிடங்கள் விரைவில் நிரப்பப்பட உள்ளதாகவும் கூறினார்.