நீர்வரத்து ஓடையை ஆக்கிரமித்த கடைகள் இடிப்பு!

தூத்துக்குடி: கோவில்பட்டியில் நீர்வரத்து ஓடையை ஆக்கிரமித்து கட்டப்பட்டிருந்த கடைகள் இடித்து தரைமட்டமாக்கப்பட்டன.

தூத்துக்குடி மாவட்டம் கோவில்பட்டி செவல்குளம் நீரோடையில் செண்பகவல்லி அம்மன் கோயில் பயன்பாட்டில் உள்ள 106 கடைகளும், தனியார் ஆக்கிரமிப்பில் 25 கடைகளும் கட்டப்பட்டிருந்தன. இதில் கடை உரிமையாளர்கள் ஓடை பகுதிகளையொட்டி கான்கிரீட் தூண்கள் எழுப்பி தங்களது வசதிக்கு ஏற்றவாறு, கடைகளை மாற்றி அமைத்துக் கொண்டதால், மழைக்காலங்களில் மழைநீர் செல்வதில் சிரமம் ஏற்பட்டுள்ளது.

ஜேசிபி இயந்திரங்களால் தகர்க்கப்பட்ட கட்டடங்கள்

கடைகள் இருக்கும் பகுதிகளில் தேங்கும் கழிவு நீரும் மழைக்காலத்தில் வரும் தண்ணீரும் சேர்ந்து சாலையில் பெருக்கெடுத்து ஓடியதால் பொதுமக்கள் கடும் அவதிக்குள்ளாகினர். இந்நிலையில், கோவில்பட்டி நீர்வரத்து ஓடையில் உள்ள ஆக்கிரமிப்புகளை அகற்ற வேண்டும் என உயர் நீதிமன்ற மதுரைக் கிளை 2010ஆம் ஆண்டு உத்தரவிட்டிருந்தது. ஆனாலும் ஆக்கிரமிப்புகளை அகற்றாமல் கோவில்பட்டி நீர்வரத்து ஓடை ஆக்கிரமிப்பு மீட்புக் குழுவினர் பல்வேறு போராட்டங்களில் ஈடுபட்டுவந்தனர்.

ஆக்கிரமிப்புகள் தகர்ப்பு

இதையடுத்து கடந்த 26ஆம் தேதி முதல்கட்டமாக ஆக்கிரமிப்பிலிருந்த 13 கடைகள் அகற்றும் பணி நடைபெற்றது. அதனைத்தொடர்ந்து இரண்டாம் கட்டமாக இன்று ஆக்கிரமிப்பிலிருந்த 12 கடைகளை அகற்றும் பணி தொடங்கியது. கோட்டாட்சியர் விஜயா, வட்டாட்சியர் மணிகண்டன், வருவாய்த் துறை, தீயணைப்புத் துறை, மின்வாரியத் துறை, நெடுஞ்சாலைத் துறை அலுவலர்கள் முன்னிலையில் மூன்று ஜேசிபி இயந்திரங்கள் மூலம் இடிக்கும் பணிகள் நடைபெற்றுவருகின்றன.

மேலும், கோவில்பட்டி காவல் துணை கண்காணிப்பாளர் ஜெபராஜ் தலைமையில், காவல் ஆய்வாளர்கள் சுதேசன், ஐயப்பன், பத்மாவதி மற்றும் உதவி ஆய்வாளர்கள் உள்பட 100-க்கும் மேற்பட்ட காவல் துறையினர் குவிக்கப்பட்டுள்ளனர்.