நாங்குநேரி தொகுதியில் தேர்தல் பரப்புரை மேற்கொள்வதற்காக நாம் தமிழர் கட்சியின் தலைமை ஒருங்கிணைப்பாளர் சீமான் விமானம் மூலம் தூத்துக்குடி வந்தடைந்தார். அப்போது செய்தியாளர்களிடம் பேசிய அவர், ”முன்னாள் பிரதமர் ராஜிவ் காந்தி குறித்து பேசியதற்கு இந்தியா முழுவதும் புகார் கொடுத்து என்னைப் புகழ்பெற வைக்கிறார்கள். அவர்களுக்கு வேறு வேலை இல்லை; எதையாவது செய்து கொண்டுதான் இருப்பார்கள்”என்றார்.
இதற்கிடையே, காங்கிரஸ்- பாஜக கட்சி இங்கே எதற்கு? அக்கட்சிகள் மொழியை மதிக்குமா? ஸ்டெர்லைட் பிரச்சனை தீர்க்குமா? அணு உலையை மூடுமா? காவிரி, முல்லைப் பெரியாறு பிரச்னையில் இந்தக் கட்சிகளின் நிலைப்பாடு என்ன என சொல்ல முடியுமா? போன்ற பல்வேறு கேள்விகளை அவர் அடுக்கினார்.
தேசியக் கட்சிகளுக்கு சவால் விட்ட சீமான் தொடர்ந்து அவர் கூறுகையில், “காமராஜர் என்றைக்கு மறைந்தாரோ அன்றைக்கே காங்கிரசும் இறந்து போய்விட்டது. கேரளாவிலேயே காங்கிரசால் வெல்ல முடியவில்லை. தமிழ்நாட்டில் கூட்டணியோடு போட்டியிட்டதால்தான் ஏழு இடங்களில் வெற்றிபெற்றது.
இங்கு ஒருபோதும் காங்கிரஸ் தனித்துப் போட்டியிட முடியாது. மக்களின் ஒரு பிரச்னைக்குக் கூட காங்கிரஸ் கட்சி போராடியது கிடையாது. மீத்தேன், நியூட்ரினோ போன்ற திட்டங்களைக் கொண்டுவந்தது காங்கிரஸ் கட்சிதான். மேடையில் அவர்கள் செய்த நல்ல திட்டங்களை சொல்லி வாக்குபெற முடியாது. மக்களுக்குக் காசு கொடுத்துதான் வாக்குகளைப் பெறுகிறார்கள்.
நான் எனது உணர்வைப் பதிவு செய்வது சிலருக்கு விருப்பமாக இருக்கிறது; சிலருக்கு வெறுப்பாக இருக்கிறது. காமராஜரைப் பற்றி பேசுவதற்கு காங்கிரஸ் கட்சியில் யாருக்கும் தகுதியில்லை. கூட்டணிக் கட்சிகளின் தயவில்லாமல் காங்கிரஸ், பாஜக ஆகிய இரு கட்சிகளும் இங்கு தனித்துப் போட்டியிட முடியாது” என்றார்.
