'சாலையில் நின்று பேசியது குற்றமா?' - தூத்துக்குடியில் மூவருக்கு நடந்த அரிவாள்வெட்டு!

தூத்துக்குடி : செய்துங்கநல்லூர் அருகே உள்ள சேரகுளத்தில் மூன்று பேர் பேசிக்கொண்டிருந்தபோது இருசக்கர வாகனத்தில் வந்த அடையாளம் தெரியாத நபர் அரிவாளால் வெட்டிவிட்டு தப்பியோடியுள்ளார்.

தூத்துக்குடி மாவட்டம், செய்துங்கநல்லூர் அருகே உள்ள இராமானுஜம்புதூர் பஜாரில் சங்கரநாராயணன்(50), ஆயிரம்(50), பூவலிங்கம் ஆகிய மூவரும் நின்று பேசி கொண்டிருந்தனர்.

அப்போது அந்த வழியாக இருச்சக்கர வாகனத்தில் தலைக்கவசம் அணிந்து வந்த மர்ம நபர் மூன்று பேரையும் சரமாரியாக அரிவாளால் வெட்டிவிட்டு தப்பியோடினார். இதில், பலத்த காயமடைந்த மூவரையும் அருகே இருந்தவர்கள் மீட்டு சிகிச்சைக்காக பாளையங்கோட்டை அரசு மருத்துவமனைக்கு அனுப்பிவைத்தனர்.

பின்பு, தகவலறிந்து சம்பவ இடத்திற்கு வந்த சேரகுளம் காவல் துறையினர், அருகில் உள்ள வணிக நிறுவனங்கள் இருக்கும் சிசிடிவி கேமரா காட்சிகளை ஆய்வு செய்தனர். ஆனால், சம்பவம் குறித்த எந்த விபரமும் கிடைக்கவில்லை. இதுகுறித்து, காவல் துறையினர் வழக்குப்பதிவு செய்து தீவிர விசாரணை நடத்தி வருகின்றனர்.

இதையும் படிங்க : டிக்கெட் கேட்ட நடத்துநருக்கு அரிவாள் வெட்டு