சைவ ஹோட்டல் உணவில் எலியின் தலை...! வாடிக்கையாளர்கள் அதிர்ச்சி...

ஆரணி அருகே சைவ ஹோட்டல் உணவில் எலியின் தலை இருந்ததால் வாடிக்கையாளர்கள் அதிர்ச்சி அடைந்தனர்.

திருவண்ணாமலை:ஆரணி டவுன் காந்திநகரில் வசித்து வருபவர் கம்பி கட்டும் கூலி வேலை செய்யும் தொழிலாளி முரளி. நேற்று ( செப்-11 ) பிற்பகலில் முரளி தன்னுடைய உறவினரின் காரிய சடங்கிற்காக ஆரணி பாலாஜி பவன் சைவ உணவகத்தில் 35 சாப்பாடு வாங்கி சென்றுள்ளார்.

உறவினர்கள் சாப்பிடும் போது பீட்ரூட் பொரியலில் இறந்த எலியின் தலை இருந்துள்ளது. இதனால் அனைவரும் அதிர்ச்சியடைந்தனர். இதனால் ஆத்திரமடைந்த முரளி மற்றும் அவரது உறவினர்கள் 20 க்கும் மேற்பட்டோர் பாலாஜி பவன் ஓட்டலுக்கு சென்று, உணவில் கிடந்த எலி தலையை காட்டி வாக்குவாதத்தில் ஈடுபட்டனர்.

இதுகுறித்து தகவலறிந்து அங்கு சென்ற காவல்துறையினர், சமரச பேச்சுவார்த்தை நடத்தினர். இதுகுறித்து உரிய விசாரணை நடத்தப்படும் என்றும் அவர்கள் உறுதி அளித்தனர்.

கடந்த சில நாட்களுக்கு முன் ஆரணி பிரியாணி சென்டரில் பிரியாணி சாப்பிட்ட பன்னிரண்டாம் வகுப்பு மாணவன் ஃபுட் பாய்சன் ஆகி இறந்த சம்பவம் மற்றும் பேருந்து நிலையம் அருகே அசைவ உணவகத்தில் கெட்டுப்போன காடைக்கறியில் புழுக்கள் நெளிந்து இருந்த சம்பவம் குறிப்பிடத்தக்கது.