திருவண்ணாமலை:கலசப்பாக்கம் தாலுகா லாடவரம் கிராமத்தைச் சேர்ந்த விவசாயி கண்ணதாசன். இவரது மகன்கள் லாடவரம் அரசு பள்ளியில் ஐந்தாம் வகுப்பு படித்து வரும் அருள், சந்திப், ஹரிகிருஷ்ணன் மகன் ஜீவன்குமார் ஆகிய 3 பேரும் அப்பகுதியிலுள்ள கங்கநல்லூர் ஏரியினுள் நேற்று மாலை குளிக்கச் சென்றுள்ளனர். மூவருக்கும் நீச்சல் தெரியாத நிலையில் ஏரியின் ஆழமான பகுதியில் மூழ்கி 3 பேரும் பரிதாபமாக உயிரிழந்தனர்.
இதனிடையே, தங்களின் குழந்தைகளைக் காணவில்லை என தேடியநிலையில், ஏரியின் அருகே பள்ளி மாணவர்களின் சீருடை மட்டும் இருந்தது. ஆனால், அங்கு யாரும் இல்லையென அப்பகுதியைச் சேர்ந்தவர் கூறியதையடுத்து தீயணைப்புத்துறை மற்றும் மீட்புக் குழுவினர் சிறுவர்களை சடலமாக ஏரியிலிருந்து இன்று (டிச.17) மீட்டனர்.