சவுதி டூ திருவள்ளூர்: தனது திருமணத்திற்காக வந்திறங்கியவருக்கு கொரோனா அறிகுறி

திருவள்ளூர்: கொரோனா வைரஸ் அறிகுறி இருப்பதால் சவுதி அரேபியாவிலிருந்து திருமணத்திற்காக சொந்த ஊர் வந்த இளைஞர் ராஜிவ்காந்தி அரசு மருத்துவமனையின் தனிமைப்படுத்தப்பட்ட அறையில் அனுமதிக்கப்பட்டுள்ளார்.

இந்தியா முழுவதும் கொரோனா பாதிப்பு அதிகரித்துவருவதால் பொதுமக்களிடையே அச்சம் ஏற்பட்டுள்ளது. குறிப்பாக வெளிநாட்டிலிருந்து வருபவர்கள் அனைவரையும் விமான நிலையத்தில் தீவிரமாகப் பரிசோதித்த பின்னரே வெளியே அனுப்பப்படுகின்றனர்.

திருவள்ளூரில் வேப்பம்பட்டு பகுதியை சேர்ந்த அருண், சவுதி அரேபியாவிலிருந்து மூன்று நாள்களுக்கு முன் தனது திருமணத்திற்காக சொந்த ஊர் வருகைதந்துள்ளார். இந்நிலையில் நேற்று, திடீரென்று அவருக்குக் காய்ச்சல், இருமல், சளி ஏற்படவே திருவள்ளூர் தலைமை அரசு மருத்துவமனையில் சிகிச்சைக்காகச் சென்றுள்ளார்.

அவரைப் பரிசோதித்த மருத்துவர்கள், கொரோனா வைரஸ் காய்ச்சல் இருக்குமோ என்ற அச்சத்தில் அங்கிருந்து மேல் சிகிச்சைக்காக சென்னை ராஜிவ்காந்தி அரசு பொதுமருத்துவமனைக்கு அனுப்பிவைத்துள்ளனர். அங்கு, அவரைக் தனிமைப்படுத்தப்பட்ட அறையில் அனுமதித்து மருத்துவர்கள் தீவிர பரிசோதனை செய்துவருகின்றனர்.

இதையும் படிங்க:மகாராஷ்டிராவில் கொரோனா வைரஸ் அறிகுறிகளுடன் இருந்த முதியவர் உயிரிழப்பு!