பணம் கொடுக்கல், வாங்கல் விவகாரம்: மூவர் கைது!

திருநெல்வேலியில் பணம் கொடுக்கல், வாங்கல் விவகாரத்தில் ஏற்பட்ட தகராறால் நண்பரை அடித்துக் கொன்றதாக மூவரை காவல் துறையினர் கைது செய்தனர்.

திருநெல்வேலி:பாளையங்கோட்டை அடுத்த என்ஜிஓபி காலனி பகுதியைச் சேர்ந்தவர், அருள் விசுவாசம் (48).

இவர் கடந்த ஜூன் 22ஆம் தேதி உடல் முழுவதும் அடிபட்ட நிலையில் ரத்தக்காயங்களுடன் வீட்டிற்கு வந்துள்ளார். இதனைக் கண்டு அதிர்ச்சியடைந்த அவரது மனைவி மேரி உடனடியாக அருள் விசுவாசத்தை பாளையங்கோட்டை அரசு தலைமை மருத்துவமனையில் சிகிச்சைக்காக சேர்த்தார்.

அங்கு தீவிர சிகிச்சையிலிருந்த அவர் நேற்றிரவு (ஜூன் 23) சிகிச்சைப் பலனின்றி உயிரிழந்தார்.

இந்நிலையில், அருள் விசுவாசத்தை அவரது நண்பர்களே கூட்டு சேர்ந்து அடித்துக் கொலை செய்ததாக அவரது மனைவிக்குத் தெரியவரவே, இதுகுறித்து பெருமாள்புரம் காவல் நிலையத்தில் புகார் அளித்தார். புகாரின் பேரில் வழக்குப்பதிவு செய்த காவல் துறையினர், விசாரணை நடத்தினர்.

விசாரணையில், அருள் விசுவாசத்தின் நண்பர்களான மரிய சிலுவை, இயேசு பால், மணிகண்டன் ஆகியோர் சேர்ந்து ரியல் எஸ்டேட் தொழில் செய்து வந்ததாகத் தெரிகிறது. இதில், மணிகண்டன் பழவூர் காவல் நிலையத்தில் முதல் நிலைக் காவலராகப் பணிபுரிந்து வருகிறார்.

நண்பரைக் கொலை செய்த மூவர்:

இந்தச் சூழ்நிலையில் இவர்களுக்குள் பணம் கொடுக்கல்-வாங்கலில் பிரச்னை ஏற்பட்டுள்ளது. அருள் விசுவாசம் பணம் கொடுக்கல், வாங்கல் விவகாரத்தில் முறையாக நடந்து கொள்ளவில்லை என்றும்; அதனால் மரிய சிலுவை, இயேசு பால், மணிகண்டன் ஆகிய மூவரும் சேர்ந்து அவர் மீது கடும் ஆத்திரத்தில் இருந்ததாகவும் கூறப்படுகிறது.

சம்பவத்தன்று மூன்று பேரும் அருள் விசுவாசத்தை அழைத்துச்சென்று மது அருந்தியுள்ளனர்.

பின்னர், ஒரு கட்டத்தில் அருள் விசுவாசத்தை மூவரும் சேர்ந்து கம்பால் சரமாரியாகத் தாக்கியுள்ளனர். இதில், படுகாயமடைந்த அருள், வேறு நண்பர்களின் உதவியோடு வீட்டுக்குச் சென்றது விசாரணையில் தெரியவந்தது.

இதையடுத்து, அருள் விசுவாசத்தைக் கொலை செய்த வழக்கில், அவரது நண்பர்கள் மூவரையும் கைது செய்த காவல் துறையினர், அவர்களிடம் விசாரணை நடத்தி வருகின்றனர்.

இதையும் படிங்க:பிணையில் வந்தவர் கடத்தி கொலை - காவல் துறையினர் விசாரணை