கற்களால் அடித்துக் கொலை செய்யப்பட்ட சிறுவன்: காவல்துறையினர் விசாரணை

தேனி: கோம்பையில் தெருவில் விளையாடிக் கொண்டிருந்த நான்கு வயது சிறுவன் ஹரிஷ் கற்களால் அடித்துக் கொலை செய்யப்பட்டுள்ள சம்பவம் அப்பகுதியில் பரபரப்பை ஏற்படுத்தியுள்ளது. இதுகுறித்து காவல்துறையினர் விசாரணை மேற்கொண்டு வருகின்றனர்.

தேனி மாவட்டம் உத்தமபாளையம் அருகே உள்ள கோம்பை பகுதியை சேர்ந்த முருகன் - கீதா தம்பதியருக்கு நான்கு வயதில் ஹரிஷ் என்ற மகன் இருந்துள்ளான். இந்நிலையில் கடந்த 2 வருடங்களுக்கு முன் இந்தத் தம்பதியினருக்கிடையே ஏற்பட்ட கருத்து வேறுபாட்டின் காரணமாக இருவரும் பிரிந்து வாழ்ந்து வந்திருக்கின்றனர். இதில் முருகன் மறவபட்டி பகுதியில் உள்ள பெண் ஒருவரை திருமணம் செய்து அங்கேயே குடியேறி உள்ளார். முருகனை பிரிந்து தனியாக வாழ்ந்து வந்த கீதா, ஒரு வருடம் கழித்து தேவாரம் பகுதியை சேர்ந்த உதயன் என்பவரை திருமணம் செய்துகொண்டு கோம்பை - தேவாரம் சாலையில் தனியே வசித்து வந்துள்ளார். இதனையடுத்து சிறுவன் ஹரிஸை கீதாவின் தந்தை வளர்த்து வந்திருக்கிறார்.

பெற்றோரின் வீட்டருகே அருகே வசித்து வந்த சிறுவன் ஹரிஷ், அவ்வப்போது இருவரது வீட்டிலும் தங்கி வந்துள்ளான். இந்நிலையில் நேற்று இரவு 8 மணிக்கு மேல் தெருவில் விளையாடிக் கொண்டிருந்த சிறுவன் நீண்ட நேரமாகியும் வீட்டிற்கு வராததால், கீதாவின் சகோதரி ராஜராஜேஸ்வரி பல இடங்களில் தேடியுள்ளார்.

இதனைத் தொடர்ந்து சிறுவனை காணவில்லை என கோம்பை காவல்நிலையத்தில் புகார் அளித்துள்ளனர். மாலை வரை காவல்துறையினர், உறவினர்கள் சிறுவன் ஹரிஸை தேடி வந்துள்ள நிலையில், மாலையில் கோம்பை அரசு ஆரம்ப சுகாதார நிலையம் அருகே உள்ள மயானத்தில் முகத்தில் கற்களால் பலமாகத் தாக்கப்பட்டு ரத்த காயத்துடன் சிறுவன் இறந்து கிடப்பதாக அப்பகுதியினர் காவல்துறையினருக்கு தகவல் அளித்துள்ளனர்.

தகவலறிந்து சம்பவ இடத்திற்கு விரைந்து வந்த காவல்துறையினர், இறந்த சிறுவனின் உடலை மீட்டு பிரேத பரிசோதனைக்காக தேனி அரசு மருத்துவமனைக்கு கொண்டு சென்றனர்.மேலும் இதுகுறித்து வழக்குப்பதிவு செய்த கோம்பை காவல்துறையினர், சிறுவனின் கொலைக்கான காரணம் குறித்து அப்பகுதியில் உள்ள கண்காணிப்பு கேமராக்களை ஆய்வு செய்து விசாரணை நடத்தி வருகின்றனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.