வேட்பாளர்களை அறிவிப்பதில் எதிர்த்தரப்பின் சட்டை கிழிந்துவிட்டது -ஆர்.பி.உதயகுமார்

தேனி: வேட்பாளர்கள் அறிவிப்பதி எதிர்த்தரப்பினரின் சட்டை கிழிந்துவிட்டது என வருவாய்த் துறை அமைச்சர் ஆர்.பி.உதயகுமார் தெரிவித்துள்ளார்.

தமிழகத்தில் ஏப்ரல் 18ஆம் தேதி நடைபெறவுள்ள நாடாளுமன்றப் பொதுத்தேர்தல், 18 தொகுதிகளுக்கான சட்டப்பேரவை இடைத்தேர்தலில் அதிமுக போட்டியிடுகின்ற தொகுதிகளுக்கான வேட்பாளர்கள் அறிவிப்பு, தேர்தல் வாக்குறுதிகள் அறிவிப்பை அக்கட்சி வெளியிட்டது. இதனைத் தொடர்ந்து நேற்று, தேனியில் வேட்பாளர்கள் அறிவிப்பு மற்றும் ஆலோசனைக் கூட்டம் நடைபெற்றது.

தேனி அருகே நடைபெற்ற கூட்டத்தில் தமிழக துணை முதலமைச்சர் ஓ.பன்னீர்செல்வம், வருவாய்த் துறை அமைச்சர் ஆர்.பி.உதயகுமார், தேனி எம்.பி., பார்த்திபன், எம்எல்ஏக்கள் ஜக்கையன்உள்ளிட்டோர் கலந்துகொண்டனர்.

இதில், பேசிய ஆர்.பி.உதயகுமார் , "ரவீந்திரநாத் குமார் தேனியில் நிறுத்தப்பட்டதால் எதிர்த்தரப்பில் யாரை நிறுத்தலாம் என காங்கிரஸ் கட்சி யோசித்துக் கொண்டிருக்கிறது.

டிடிவி தினகரன் வேட்பாளரை தேடிக்கொண்டிருக்கிறார். தானே நிற்கலாம் என்றுகூட பேசிவருகிறார். வேட்பாளர்களை அறிவிப்பதில் அவர்கள் சட்டை கிழிந்துவிட்டதாகச் சொல்லப்படுகிறது.

மேலும் ஜெயலலிதா உயிரோடு இருந்தாலும் தேனி நாடாளுமன்ற வேட்பாளராக ரவீந்திரநாத் குமார்தான் அறிவிக்கப்பட்டிருப்பார்" என தெரிவித்தார்.