10 மாத பெண் குழந்தையை, கிணற்றில் வீசி கொலை செய்த தந்தை!

தேனி: கணவன் - மனைவி இடையே ஏற்பட்ட சண்டையில் 10 மாத பெண் குழந்தையை கிணற்றில் வீசி கொன்ற தந்தையை காவல் துறையினர் தேடி வருகின்றனர்.

தேனி மாவட்டம் போடி ஜமீன் தோப்பு பகுதியைச் சேர்ந்தவர் பன்னீர்செல்வம். இவருக்கும் கோடாங்கிபட்டி தென்றல் நகரைச் சேர்ந்த அழகுமணி என்பவருக்கும் ஏழாண்டுகளுக்கு முன்பு காதல் திருமணம் நடைபெற்றது. இவர்களுக்கு கபிலன் (4) என்ற மகனும், காவ்யா என்ற 10 மாத பெண் குழந்தையும் உள்ளது. கணவன் பன்னீர்செல்வம் வேலைக்கு செல்லாமல் மனைவி நடத்தையில் சந்தேகப்பட்டதன் காரணமாக இருவருக்கும் இடையே அவ்வப்போது சண்டை ஏற்பட்டு வந்துள்ளது.

சண்டை காரணமாக அழகுமணி கோடாங்கிபட்டியில் உள்ள தனது தாய் வீட்டில் கடந்த இரண்டு நாட்களாக தங்கி வந்தார். பிற்பகல் மனைவியின் வீட்டிற்கு வந்த கணவர் பன்னீர்செல்வம் கடுமையான வாக்குவாதத்தில் ஈடுபட்டு தனது 10 மாத பெண் குழந்தையை கொன்று விடுவேன் எனக் கூறி தூக்கிச் சென்றுள்ளார். பதற்றமடைந்த மனைவி அழகுமணி பழனிசெட்டிபட்டி காவல் நிலையத்தில் கணவர் குழந்தையை கொலை செய்வதாக கூறி தூக்கிச் சென்றதாக புகாரளித்துள்ளார்.

இதற்கிடையே மனைவி மீது புகார் அளிக்க காவல் நிலையத்திற்கு வந்த பன்னீர்செல்வம் மனைவி இருப்பதைக்கண்டு காவல் நிலையத்திலிருந்து ஓட்டம் பிடித்தார். இதற்கிடையே கோடாங்கிபட்டியில் உள்ள தனியார் தோட்ட கிணற்றில் 10 மாத குழந்தை காவ்யா இறந்த நிலையில் கிடப்பதாக காவல்துறையினருக்கு தகவல் கிடைத்துள்ளது.

இதைத்தொடர்ந்து தீயணைப்பு துறையினர் உதவியுடன் குழந்தை காவ்யாவின் சடலத்தை மீட்டு உடற்கூறாய்வுக்காக தேனி மருத்துவக்கல்லூரி மருத்துவமனைக்கு அனுப்பி வைத்தனர். 10 மாத குழந்தையை தந்தையே கிணற்றில் வீசி கொலை செய்த சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது