தேனியில் கனமழை; தென்னை, வாழை மரங்கள் சாய்ந்து நாசம்!

தேனி: சின்னமனூர் அருகே இடி, மின்னல் மற்றும் பலத்த காற்றுடன் கூடிய மழையால் பல ஏக்கர் பரப்பளவில் பயிரிடப்பட்டிருந்த தென்னை, வாழை மரங்கள் சரிந்து விழுந்து நாசமாகின.

தேனி மாவட்டத்தில் பெரியகுளம்,தேனி, சின்னமனூர் மற்றும் அதன் சுற்றுவட்டாரப் பகுதிகளில் நேற்று இரவு இடி, மின்னல் மற்றும் பலத்த காற்றுடன் கூடிய மழை பெய்தது. இதில் சின்னமனூர் அருகே உள்ள குச்சனூர், துரைச்சாமிபுரம், கூழையனூர் உள்ளிட்ட இடங்களில் அடித்த பேய் காற்றுக்கு வாழை, தென்னை மரங்கள் அடியோடு ஒடிந்து விழுந்து நாசமாகின.

இதனால் பல ஏக்கர் பரப்பளவில் பயிரிடப்பட்டிருந்த சுமார் ஆயிரத்துக்கும் மேற்பட்ட பூவன், பச்சை, செவ்வாழை மரங்கள் சேதமாகின. மேலும் சுமார் 50க்கும் மேற்பட்ட தென்னை மரங்களும் நேற்று அடித்த காற்று தாக்குப்பிடிக்க முடியாமல் வேறோடு, வேறாக சாய்ந்துள்ளன.

இதுகுறித்து விவசாயிகள் கூறுகையில், 25 30 ஆண்டுகள் பராமரித்து தற்போது பலன் தரக்கூடிய நிலையில் இருந்த தென்னை மரங்கள் புயல் காற்றினால் நாசமாகியுள்ளன. சில தினங்களில் காய்கள் பூக்கத் தொடங்கும் வாழையும் அடியோடு சாய்ந்து கிடக்கிறது.

இதனால் பல லட்சம் ரூபாய் நஷ்டம் ஏற்பட்டுள்ளது. மேலும் ஒடிந்து விழுந்த மரங்களை அப்புறப்படுத்துவதற்கு பல ஆயிரம் ரூபாய் செலவு ஏற்படுவதாக வேதனை தெரிவிக்கின்றனர். எனவே தமிழக அரசு விவசாயிகளுக்கு உரிய நிவாரணம் அறிவித்து உடனடியாக இழப்பீடு தொகை வழங்க வேண்டும் என கோரிக்கை விடுத்துள்ளனர்.