சுற்றுலாப் பயணிகள் அதிகரிப்பால் வாகனங்கள் செல்ல சிரமம்!

நீலகிரி: கோடை சீசன் நிறைவுபெற்றும் சுற்றுலாப் பயணிகளின் எண்ணிக்கை தொடர்ந்து அதிகரித்து வருகிறது.

நீலகிரி மாவட்டத்தில் மே 31ஆம் தேதியுடன் கோடை சீசன் நிறைவுபெற்றது. குன்னூரில் உள்ள சிம்ஸ் பூங்கா, லேம்ஸ்ராக், டால்பின்நோஸ், காட்டேரி பூங்கா உள்ளிட்ட சுற்றுலா மையங்களில் சுற்றுலா பயணிகளின் கூட்டம் கடந்த ஆண்டுகளை விட இந்த ஆண்டு அதிகரித்துக் காணப்படுகிறது.

தற்போது கோடை சீசன் நிறைவுபெற்று பருவ மழை தொடங்கியுள்ள நிலையில், குன்னூர் பகுதிகளில் மழையின் தாக்கம் குறைவாகவே உள்ளது. ஓரிரு நாட்கள் மட்டும் மழை பெய்தது, மற்ற நாட்களில் மழையில்லாமல் இதமான காலநிலை நிலவுகிறது.

இதனால் குன்னூர் சிம்ஸ் பூங்கா, லேம்ஸ்ராக், டால்பின்நோஸ் காட்சி முனைகளில் கூட்டம் அதிகரித்துள்ளது. இதுமட்டுமின்றி லேம்ஸ்ராக் செல்லும் சாலையோரங்களில் உள்ள தேயிலைத் தோட்டங்களில் ஏராளமான சுற்றுலாப் பயணிகள் இயற்கை காட்சிகளை ரசித்துச் செல்வதுடன், செல்ஃபி எடுத்தும் செல்கின்றனர். பயணிகள் கூட்டம் அதிகரித்துள்ளதால், வாகனங்கள் நீண்ட வரிசையில் மெதுவாக நகர்ந்து செல்கிறது

.