கனமழையால் நீலகிரியில் அணைகள் திறப்பு!

நீலகிரி: ஐந்தாவது நாளாக பெய்து வரும் கனமழையால் பாதுகாப்பு கருதி குந்தா, கிளன்மார்கன் அணைகளில் இருந்து தண்ணீர் திறந்துவிடப்பட்டுள்ளது.

நீலகிரி மாவட்டத்தில் கடந்த ஐந்து நாட்களாக கனமழை பெய்துவருகிறது. இதனால் பள்ளி கல்லூரிகளுக்கு விடுமுறை அறிவிக்கப்பட்டுள்ளது.

இந்நிலையில் இன்று காலை முதல் மழை இடைவிடாமல் கொட்டியதால் பொதுமக்களின் இயல்பு வாழ்க்கை முற்றுலும் பாதிக்கப்பட்டது. மழைநீர் வெள்ளம் சாலைகளில் ஆறுபோல் பெருக்கெடுத்து ஓடியதால், பல குடியிருப்பு பகுதிகளுக்குள் புகுந்ததால் பாதிக்கப்பட்ட மக்கள் எங்கு செல்வது என செய்வதிறியாமல் உள்ளனர்.

கொட்டி வரும் மழையினால் பாலாடா, முத்தோரை, காக்காதோப்பு, இத்தலார், பேலிதளா உள்ளிட்ட பகுதிகளில் ஆயிரத்திற்கும் மேற்பட்ட ஏக்கரில் பயிரிட்டிருந்த மலை காய்கறிகளான கேரட், பீட்ரூட், முட்டைகோஸ், உருளைக்கிழங்கு ஆகியவை நீரில் மூழ்கியதால் விவசாயிகள் கவலையடைந்துள்ளனர். மேலும் தொடர் மழையினால் 50க்கும் மேற்பட்ட கிராமங்களுக்கு செல்லும் சாலை போக்குவரத்து துண்டிக்கபட்டுள்ளது. இதனால் பொதுமக்கள் தங்களின் சொந்த ஊருகளுககு செல்ல முடியாமல் தவித்துவருகின்றனர். தொடர்ந்து கனமழை பெய்து வருவதால் உதகை–மைசூர் செல்லும் தேசிய நெடுஞ்சாலை போக்குவரத்தும் பாதிக்கப்பட்டுள்ளது.

இதே போல கனமழை பெய்து வரும் நிலையில் உதகையில் நிலச்சரிவு ஏற்படும் அபாயம் உள்ளதால் மக்கள் அச்சத்தில் உள்ளனர். கனமழை காரணமாக நீலகிரி மாவட்டத்தில் உள்ள அணைகளின் நீர்மட்டம் உயர்ந்து வருகிறது. பாதுகாப்பு கருதி குந்தா, கிளன்மார்கன் அணைகளில் இருந்து தண்ணீர் திறந்துவிடப்பட்டுள்ளது.