ராமலிங்கம் கொலை வழக்கு: ஷாலிக் வீட்டில் என்ஐஏ அதிரடி சோதனை!

தஞ்சாவூர்: திருப்புவனம் பாமக பிரமுகர் ராமலிங்கம் கொலை வழக்கில் கைதான மைதீன் அகமது ஷாலிக் வீட்டில் தேசிய புலனாய்வு முகமை அலுவலர்கள் இன்று சோதனையிட்டனர்.

தஞ்சாவூர் மாவட்டம் கும்பகோணம் அருகேயுள்ள திருப்புவனத்தைச் சேர்ந்த பாமக பிரமுகர் ராமலிங்கம், அப்பகுதியில் நடக்கும் மதமாற்றத்திற்கு எதிர்ப்பு தெரிவித்ததால் படுகொலை செய்யப்பட்டார். இக்கொலை வழக்கு தொடர்பாக ஏற்கனவே சிலர் கைது செய்யப்பட்டு சிறையிலடைக்கப்பட்டனர். இந்த வழக்கினை தேசிய புலனாய்வு முகமை அலுவலர்கள் விசாரித்து வருகின்றனர்.

இந்நிலையில், தேசிய புலனாய்வு முகமை அலுவலர்கள், திருநெல்வேலி மாவட்டம் தென்காசியைச் சேர்ந்த ஷாலிக் என்ற மைதீன் அஹமது ஷாலிக் என்பவரை விசாரணைக்காக கடந்த 25-ஆம் தேதி கொச்சி அலுவலகத்துக்கு அழைத்துச் சென்று விசாரணைக்கு பிறகு மறுநாள் கைது செய்தனர். இதனைத் தொடர்ந்து இன்று காலை தேசிய புலனாய்வு முகமை அலுவலர்கள் , தென்காசி வருவாய் துறையினர் உள்ளிட்ட குழுவினர் ஷாலிக்கின் வீட்டில் சோதனைட்டு அவரது பாஸ்போர்ட், ஆதார் அட்டை உள்ளிட்ட ஆவணங்களைக் கைபற்றியதாக தெரிகிறது.

இது குறித்து அவரது உறவினர்கள் கூறுகையில், "இந்த வழக்கில் அவர் திட்டமிட்டு கைது செய்யப்பட்டதாகவும், அவருக்கும் இந்த கொலை வழக்குக்கும் தொடர்பு இல்லை என்றும், வழக்கறிஞர் சந்திக்க வாய்ப்பு வழங்கவில்லை என்றும் தெரிவித்துள்ளனர். இந்த சோதனை காரணமாக அந்த பகுதியில் சுமார் இரண்டு மணி நேரம் பரப்பரப்பான நிலை நீடித்தது.