பொன்னமராவதி பிரச்னை: காரைக்குடியில் சாலை மறியல்

சிவகங்கை: புதுக்கோட்டை மாவட்டம், பொன்னமராவதியில் ஒரு தரப்புப் பெண்களை வாட்ஸ்அப்பில் இழிவாக பேசியவர்களைக் கண்டித்து, காரைக்குடியில் 200-க்கும் மேற்பட்டோர் சாலை மறியலில் ஈடுபட்டனர்.

புதுக்கோட்டை மாவட்டம், பொன்னமராவதியில் ஒரு தரப்புப் பெண்களை இழிவாகப் பேசி வாட்ஸ்அப்பில் ஆடியோ வெளியாகியது. இதனால், அப்பகுதியில் பதற்றம் நிலவியது. இது குறித்து சிலர் மீது வழக்குப்பதிவும் செய்யப்பட்டது.

இந்நிலையில், இவ்விவகாரத்தைக் கண்டித்தும், இதில் தொடர்புடையவர்களை கைது செய்யக்கோரியும் காரைக்குடி அருகே 200-க்கும் மேற்பட்டோர் சாலை மறியலில் ஈடுபட்டனர்.

பின்னர், தகவலறிந்து சம்பவ இடத்திற்கு விரைந்து வந்த காவல் துறையினர் அவர்களிடம் பேச்சுவார்த்தை நடத்தி அங்கிருந்து கலைந்து செல்லவைத்தனர். இப்போராட்டத்தால், அப்பகுதியில் இயங்கும் கடைகள் அடைக்கப்பட்டு, சுமார் இரண்டு மணி நேரம் போக்குவரத்தும் பாதிக்கப்பட்டது.