கீழடி அகழாய்வில் கி.மு. 2600 ஆண்டுகளுக்கு முந்தைய இரும்புப் பொருட்கள் கண்டெடுப்பு!

கீழடி எட்டாம் கட்ட அகழாய்வில் முன்னோர்கள் பயன்படுத்திய பெரிதும் சிறிதுமாக இரும்புப் பொருட்கள் கண்டுபிடிக்கப்பட்டுள்ளன.

சிவகங்கை:கீழடியில் எட்டாம் கட்ட அகழாய்வுப் பணி, கடந்த பிப்ரவரி மாதம் தொடங்கி நடைபெற்று வருகிறது. இந்நிலையில், கீழடியில் 5 குழிகள் தொண்டப்பட்டு அகழாய்வுப் பணி நடைபெற்று வருகிறது. இதில் ஒரு குழியில் சுமார் 4அடி ஆழத்தில் தோண்டும்போது பெரிதும் சிறிதுமாக 3 இரும்புப் பொருட்கள் கிடைத்துள்ளன.

இதன் மூலம் நம் முன்னோர்கள் கி.மு 2600 ஆண்டுகளுக்கு முன்பு இரும்பு உருக்காலைகள் முலம் இரும்புப் பொருட்களை உருக்கி பல்வேறு பொருட்களாகப் பயன்படுத்தி இருப்பது தெரிய வருகிறது என்று தொல்லியல் துறை ஆராய்ச்சியாளர்கள் தரப்பில் கூறப்படுகிறது.

இந்த இரும்புப் பொருட்களைத் தொடர்ந்து ஆய்வு பண்ணும் பட்சத்தில் இதனுடைய முழு விவரங்களும் தெரிய வரும் என்று தொல்லியல் துறை ஆராய்ச்சியாளர்கள் கூறுகின்றனர். இதனைத்தொடர்ந்து கீழடி , அகரம், கொந்தகை ஆகிய இடங்களில் தொடர்ந்து அகழாய்வுப் பணிகள் நடந்து வருகின்றன.