'சேலம் சரகத்தில் 18 போலி மருத்துவர்கள் கைது' - டிஐஜி ராஜேஸ்வரி பேட்டி

சேலம் காவல் துறை சரகத்தில் கடந்த ஒரு மாதத்தில் மட்டும் இதுவரை 18 போலி மருத்துவர்கள் கைது செய்யப்பட்டுள்ளதாக சரக டிஐஜி ராஜேஸ்வரி தகவல் தெரிவித்துள்ளார்.

சேலம்மாவட்ட காவல் கண்காணிப்பாளர் அலுவலகத்தில் இன்று (ஏப்.19 ) மக்கள் குறைதீர்க்கும் முகாம் நடைபெற்றது. இந்த முகாமில் சேலம் மாவட்டத்தில் பல்வேறு பகுதிகளில் இருந்து ஏராளமானோர் கலந்து கொண்டனர். இந்த மக்கள் குறைதீர்க்கும் முகாமில் சரக டிஐஜி ராஜேஸ்வரி மற்றும் மாவட்ட காவல் கண்காணிப்பாளர் சிவகுமார் ஆகியோர் கலந்து கொண்டு புகார்தாரர் மனுக்களைப் பெற்றுக் கொண்டு அவற்றின் மீது விசாரணை மேற்கொண்டனர்.

இதனைத் தொடர்ந்து செய்தியாளர்களிடம் பேசிய டிஐஜி ராஜேஸ்வரி, ''சேலம் சரகத்துக்கு உட்பட்ட சேலம், தருமபுரி, கிருஷ்ணகிரி, நாமக்கல் ஆகிய நான்கு மாவட்டங்களில் மக்கள் குறைதீர்க்கும் முகாம் மாதம்தோறும் இரண்டாவது புதன் கிழமைகளில் கூடுதல் கண்காணிப்பாளர் தலமையில் நடைபெற்று வருகிறது.

சேலம் மாவட்டத்தில் இன்று நடைபெற்ற முகாமில் இதுவரை 60 மனுக்கள் பெறப்பட்டுள்ளன. அந்த மனுக்கள் மீது உரிய விசாரணை மேற்கொண்டு உடனடி தீர்வு காணப்படும். ஏற்கனவே, காவல் நிலையத்தில் அளித்த புகார்கள் மீது நடவடிக்கை எடுக்கப்படாத மனுக்களையும் புது மனுக்களாக சேர்த்து, அந்த மனுக்கள் மீதும் உரிய நடவடிக்கை எடுக்கப்படுகிறது.

முதற்கட்டமாக மனுக்கள் மீது சிஎஸ்ஆர் பதிவு செய்து பின்னர் உரிய விசாரணை மேற்கொண்டு உடனடியாக தீர்வு காணப்படும். குறிப்பாக அதிக அளவில் நிலம் தொடர்பான பிரச்னைகள், மோசடிகள் குறித்து மனுக்கள் வந்துள்ளன” என்று தெரிவித்தார்.

மேலும் அவர் கூறுகையில், ''சேலம் சரகத்தில் போலி மருத்துவர்கள் கண்டறியப்பட்டு கைது செய்யப்பட்டு வருகின்றனர். இதுவரை 18 போலி மருத்துவர்கள் கைது செய்யப்பட்டுள்ளனர். தொடர்ந்து தீவிர கண்காணிப்பு மேற்கொள்ளப்பட்டு வருகிறது.

மருத்துவப் படிப்பு படிக்காமல் மருத்துவம் பார்ப்பது கண்டறியப்பட்டால் கைது செய்து அவர்கள் மீது சட்டப்படி நடவடிக்கை எடுக்கப்படும். ஆணவப் படுகொலை சம்பவம் குறித்து காவல் துறை சார்பில் பொதுமக்களிடையே விழிப்புணர்வும் ஏற்படுத்தப்பட்டு வருகிறது'' என்றும் கூறினார்.

இதையும் படிங்க:ஒரு தொகுதியில் வேட்பாளர் அறிவிப்பு - கர்நாடகாவில் தனித்துப்போட்டி?; ஈபிஎஸ்ஸின் வியூகம் என்ன?