தேர்தல் விதிமுறைகளை மீறி வாக்கு சேகரிப்பு: பொதுமக்கள் பாதிப்பு!

ராமநாதபுரம்: தேர்தல் விதிமுறைகளை மீறி திமுக கூட்டணி கட்சி வேட்பாளர் நவாஸ் ராமேஸ்வரத்தில் வாக்கு சேகரித்ததால், போக்குவரத்து பாதிப்பு ஏற்பட்டது.

திமுக கூட்டணிக் கட்சியான முஸ்லீம் லீக் கட்சி கட்சியின் ராமநாதபுரம் நாடாளுமன்ற வேட்பாளரான நவாஸ் கனி இன்று ராமேஸ்வரத்தில் பரப்புரை மேற்கொண்டார்.

ராமேஸ்வரத்திற்கு அருகில் உள்ள மாங்காடு, ராம தீர்த்தம், திட்டக்குடி உள்ளிட்ட பகுதிகளில் திறந்த வாகனத்தில் வாக்கு சேகரிப்பில் ஈடுபட்டார். இந்த சமயத்தில் தேர்தல் விதி முறையை மீறும் விதமாக 100க்கும் மேற்பட்ட இருச்சக்கர வாகனத்தில் கட்சியினர் அவருடன் வந்தனர்.

இதனால் அப்பகுதியில் போக்குவரத்து பாதிப்பு ஏற்பட்டது. இதனால் சுற்றுலாப்பயணிகள் மிகுந்த சிரமம் அடைந்தனர். மேலும் இரு சக்கர வாகனத்த்தில் பயணம் செய்த யாரும் தலைக்கவசம் அணியாமல் இருந்தனர். இருந்தும் காவல்துறையினரும் இவர்களை கண்டு கொள்ளாமல் இருந்தது குறிப்பிடத்தக்கது.